भांगरभूंय | प्रतिनिधी
पणजी: पावसाक आजूनय ४० दिसां परस चड काळ उरिल्लो आसतनाच राज्यांतल्या पांच मुखेल धरणांतलो उदकाचो सांठो अर्द्या परस उणो जाला. अंदूं जर पावसाळ कळाव जाल्यार राज्यांत उदकाचो उणाव जावपाचो भंय उक्तायला. गोंयांत ७ जून मेरेन पावस येता. हाका लागून अंदूंय पावस येवप सामकें गरजेचें जालां.
उदका पुरवण विभागान दिल्ले म्हायती प्रमाण, अंजुणे धरणाची उदकाची पातळी ३० टक्क्यां मेरेन सकयल देंवल्या. जाल्यार पंचवाडी धरणांत ४२ टक्के सांठो उरला. तशेंच साळावले धरण ४७ टक्के, तिळारी ४५ टक्के आनी आमठाणे धरणांत ४३ टक्के उदकाचो सांठो आसा. हे तुळेंत गवाणें आनी चापोली धरणांनी सध्या जाय तसो सांठो उपलब्ध आसा.
पेयजल विभाग सदांच धरणांतले उदकाचे पातळेचो नियाळ करता. पावसा मेरेन पावतलो असो उदका सांठो धरणांत उपलब्ध आसा, अशी म्हायती पेयजल विभागाचे मुखेल अभियंता भेंडे हांणी दिली. तशेंच, जर पावसाक उशीर जालो जाल्यार आमठाणे धरणांत तिळारीचें उदक अदीक प्रमाणांत सोडपाची पर्यायी वेवस्था करतले, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
