अंदूं गोंयकारांचें देश सोडपाचें प्रमाण देंवलें

भांगरभूंय | प्रतिनिधी

पासपोर्ट सरेंडरांत 26 टक्के, जाल्यार रद्द जावपांत 33 टक्के उणाव

भांगरभूंय । समीप नार्वेकार

पणजी : अंदूं गोंयकारांचें देश सोडपाचें प्रमाणा देंवलां. फाटल्या वर्साचे तुळेंत 2025 त पासपोर्ट सरेंडर करून देश सोडपाचें प्रमाण 26 टक्के उणें जालां. तशेंच सरकारा कडल्यान पासपोर्ट रद्द करपाच्या प्रमाणांत 33 टक्के उणाव नोंद जाला, अशी म्हायती प्रादेशीक पासपोर्ट कचेरेन दिल्या.

पासपोर्ट भवन, पणजीच्या प्रादेशीक पासपोर्ट अधिकाऱ्यान ‘भांगरभूंय’क दिल्ले आंकडेवारींत दिसून आयलां, फाटल्या 10 वर्सांत 24,378 गोंयकारांनी आपले पासपोर्ट सरेंडर केल्यात. जाल्यार दोट्टी पासपोर्ट बाळगिल्ल्या प्रकरणांत तशेंच भारतीय नागरिकत्व अस्तिवांत आसतना आपलो जल्म पुर्तुगालांत नोंद केल्ल्या कारणान पासपोर्ट कचेरेन 937 जाणांचे भारतीय पासपोर्ट रद्द केल्यात. फक्त 2025 त 11 टक्के गोंयकारांनी आपले पासपोर्ट सरेंडर केल्यात जाल्यार 33 टक्के गोंयकारांचे पासपोर्ट रद्द जाल्यात.

2024 चे तुळेंत 2025 त पासपोर्ट सरेंडर करपांत आनी ते रद्द जावपाच्या प्रमाणांत उणाव नोंद जाला. फाटल्या दोन वर्सात हो आंकडो खूब वाडिल्लो. 2024 त 3874 गोंयकारांनी आपले पासपोर्ट सरेंडर केल्यात आनी 2025 त हो आंकडो उणो जावन 2838 पासपोर्ट सरेंडर करपी गोंयकारांची नोंद जाल्या. जाल्यार 2024 त 372 गोंयकारांचे पासपोर्ट रद्द जाल्ले आनी 2025 त हो आंकडो उणो जावन 312 गोंयकारांचे पासपोर्ट रद्द जाले.

2016 ते 2020 ह्या काळांत पासपोर्ट सरेंडर करपी गोंयकारांच्या आंकड्यांत बरोच उणाव जाल्लो, पूण 2021 चे सुरवेक पासपोर्ट सरेंडर जावपाचें प्रमाण तेंगशेर पावले. 2016 त 2662 जाणांनी पासपोर्ट सरेंडर केल्ले आनी 2020 त पासपोर्ट सरेंडर करप्यांचो आंकडो देंवून 924 चेर पावलो, पूण 2021 त ह्या आंकड्यांत परतून वाड जावन 1301 जाणांनी पासपोर्ट सरेंडर केले आनी 2024 त सगल्यांत चड 3874 पासपोर्ट सरेंडर जाले. मजगतीं, 2016 ते 2022 मेरेन धा परस उणें पासपोर्ट रद्द जाताले, पूण 2023 त पासपोर्ट रद्द जावपाच्या आंकड्यान शेंकडो हुंपलो. 2016 त 9 पासपोर्ट रद्द जाल्ले आनी 2023 त हो आंकडो 2 मेरेन देंवलो. 2023 त हो आंकडो धपक्याक 122 मेरेन पावून, 2024 त सगल्यांत चड 472 पासपोर्ट रद्द जाले.