भांगरभूंय | प्रतिनिधी
प्रधानमंत्री मोदी हांचें राष्ट्राक उद्देशून भाशण
विधेयक मंजूर जावंक नाशिल्ल्यान मागली माफी
पुराय विरोधी पक्ष भ्रूणहत्येच्या कृत्या खातीर दोशी
खबरां संस्था
नवी दिल्ली : आपले खातीर राष्ट्रहीत हेंच सर्वोच्च आसा. तरी लेगीत जेन्ना कांय व्यक्तीं खातीर पक्षहीत हेंच सर्वस्व जाता. पक्षहीत हें राष्ट्रहिता परस अदीक म्हत्वाचें थारता, तेन्ना ताचे परिणाम निमाणे कडेन नारीशक्तीकूच भोगचे पडटात. प्रधानमंत्री नरेंद्र मोदी हांणी शेनवारा रातच्या 8.30 वरांचेर महिला आरक्षणाच्या विशयाचेर देशाक उद्देशून भाशण करपाक सुरवात केली. तांणी सांगलें, ह्या विधेयकांतल्यो दुरुस्ती मंजूर करप शक्य जावंक ना. आपूण सगल्या आवय आनी भयणांची माफी मागतां.
प्रधानमंत्र्यान ठामपणान सांगलें, काँग्रेस, टीएमसी आनी डीएमके हांचे सारके विरोधी पक्ष हे ‘भ्रूणहत्ये’ खातीर (विधेयकाचे हत्ये खातीर) दोशी आसात. तांणी ह्या पक्षांक देशाच्या संविधानाचे आनी नारीशक्तीचे गुन्यांवकार आशिल्ल्याचें घोशीत केलें. जांणी देशाचे अर्दे लोकसंख्येचे अधिकार झोमून घेतल्यात, तांकां ह्या पापाची ख्यास्त निश्चीत भोगची पडटली, अशी तांणी शिटकावणी दिली.
पुराय विरोध पक्ष हे भ्रूणहत्येच्या कृत्या खातीर दोशी आसा. काँग्रेसीच्या मनांत महिला आरक्षणा विशीं खर नसाय आसा. तांणी सेगीत तातूंत आडखळी हाडल्यात. हे खेपे लेगीत महिला आरक्षण आडावपाच्या यत्नांत काँग्रेस आनी तांच्या इश्ट पक्षांनी एका फाटोफाट अश्या नव्या फटीच्या गजालींचो आदार घेतलो. मागीर ते आंकडेवारी कडेन संबंदीत मुद्दे उपस्थीत करून आसूं वा हेर खंयच्याय दुसऱ्या मार्गान, काँग्रेस आनी तांच्या भागिदारांनी देशाची दिशाभूल केल्या. ह्या पक्षांनी भारतांतल्या बायलां मुखार आपलें खरें रूप उक्तें केलां. तांणी आपलें म्होवाळें कुशीक काडलां. वैयक्तीक तरेन आपल्याक आस्त आशिल्ली, काँग्रेस आपली दसकां सावनची चूक सुदरतलो, पूण ह्या पक्षान बायलांच्या फाटल्यान उबे रावपाची संद वगडायली, अशें प्रधानमंत्र्यान सांगलें.
फाटल्या 40 वर्सां सावन अधांतरी उरिल्ले बायलांचे अधितार तांकां 2029 चे लोकसभा वेंचणुके सावन दिवप हो हे घटना दुरुस्तीचो उद्देश आशिल्लो. हें विधेयक म्हणल्यार बायलांक नवी संद आनी नवीं क्षितिजां उपलब्ध करून दिवपाच्या, तशेंच तांचे उदरगतीच्या मार्गा वयल्यो आडखळी पयस करपाच्या उद्देशान हातांत घेतिल्लो एक महायज्ञ आशिल्लो. देशाचे लोकसंख्येच्या 50 टक्के म्हणल्यार अर्द्या वांट्याक सक्षम करपाचो हो एक प्रामाणीक यत्न आशिल्लो. हें विधेयक काळाची गरज आसा. उत्तर, दक्षीण, पूर्व आनी अस्तंत अशा सगल्या दिसांनी तशेंच सगल्या राज्यांनी नारीशक्तीची समन्यायी वाड सुनिश्चीत करचे खातीर उखलिल्लें हें एक पावल आशिल्लें. ज्या पक्षांनी ह्या विधेयकाक विरोध केलो, तांकां आपूण ठामपणान सांगतां, तुमी नारीशक्तीक खुबूच गृहीत धरतात. 21व्या शेंकड्यांतली बायल दरेकल्याचेर बारीक नदर दवरून आसा, हें तुमी विसरतात. ती तुमचे खरे उद्देश सहजतायेन वळखता, अशें प्रधानमंत्र्यान सांगलें. महिला आरक्षणाच्या मार्गांत आडखळ निर्माण करून ह्या पक्षांनी राज्यघटनेच्या निर्मात्यांच्या भावनांचो अपमान केला.
‘प्रस्ताव हारिल्ल्यान वेदना जाल्यो’
काँग्रेस, द्रमुक आनी समाजवादी पक्ष ह्या सारक्या पक्षांनी केल्ल्या सुवार्थी राजकारणाची किमत देशांतल्या बायलांक मेजची पडटली. देशभरांतल्या लाखांनी बायलांचे दोळे संसदे कडेन लागिल्ले. देशांतलीं बायलां हें सगलें पळयतालीं. बायलांच्या हिताची राखण करपाच्या उद्देशान मांडिल्ल्या प्रस्तावाची हार पळोवन आपल्याकूय वेदना जाल्यो. तरी लेगीत काँग्रेस, द्रमुक, तृणमूल काँग्रेस आनी समाजवादी पक्ष हांचे सारके घराणेशायेचेर आदारीत पक्ष मात उमेदीन ताळयो मारताले, अशें प्रधानमंत्री मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
