भांगरभूंय | प्रतिनिधी
भांगरभूंय । प्रतिनिधी
पणजीः गोंयांत राबितो करून आशिल्लो वादग्रस्त बिल्डर गौरव बक्षी हांणी आपलो रिअल इस्टेट एजंट म्हूण नोंदणी रद्द करपाचो अर्ज केला. बक्षीन अचकीत एजंट म्हूण नोंदणी रद्द करप ही चर्चेची गजाल जाल्या.
आम आदमी पक्षाचे संस्थापक वांगडी आनी तशेंच बिल्डर गौरव बक्षी हो मूळ दिल्लीचो. पूण तो करंजाळे कितलीशींच वर्सा रिअल इस्टेट वेवसाय करता.
शेनवारा ताणें गोंय रियल इस्टेट नियमन प्राधिकरणांत (रेरा) रिअल इस्टेट एजंट ही नोंदणी रद्द करची म्हूण अर्ज केला. रेरान जारी केल्ले भौशिक कळोवणे प्रमाण रिअल इस्टेट एजंट गौरव बक्षी नोंदणी क्रमांक एजीजीओ 07241589 हाची नोंदणी रद्द करपाक खंयचेय व्यक्तीक वा कायदेशीर संस्थेक कसलोय आक्षेप आनी हरकती आसल्यार त्यो 15 दिसा भितर मांडपाची सुचोवणी केल्या.
गौरव फाटले कांय म्हयने वादाचे खबरांक लागून बरोच फामाद जाल्लो. सगळ्यांत पयली ताका नुस्तेमार मंत्री निळकंठ हर्णळकार हांकां आडमेळीं हाडिल्ले खातीर अटक जाल्ली, तशेंच सोशल मिडीयाचेर मुख्यमंत्री डॉ. प्रमोद सावंत हांची बदनामी केल्ले प्रकरणात ताका अटक जाल्ली आनी दिवाडी जुंव्यार आपलो बांदकाम प्रकल्प बांदतना एक मुंडकार फामिलीक ताणें पिडपाचो यत्न केल्ल्याचो आरोप जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
