मडगांव शारांतल्या उड्डाण पूल रस्त्याच्या बांदकामा खातीर येरादारीचेर तात्पुरतो निर्बंध

भांगरभूंय | प्रतिनिधी

मडगांवः शारांतल्या पॉवर हाऊस सर्कल/दवर्ली सर्कल ते रावणफोंड सर्कला मेरेन 4-लेन उड्डाण पूल रस्त्याचें बांदकाम चालू आसून ह्या उड्डाण पूल रस्त्याच्या खांब्याचेंर काँक्रिटाच्यो पाटयों (girder) उबारपाचे काम 20 ते 24 एप्रिल 2026 मेरेन करतले. गर्डर उबारपाचे काम चालू आसतना कसल्योच आडमेळीं येवच्यो न्हय आनी सुरक्षीत पणान काम जावचे म्हूण पॉवर हावस सर्कल/दवर्ली सर्कल ते रावणफोंड सर्कला मेरेनच्या वाठारांत येरादारीचेर निर्बंध घाल्यात.
पॉवर हावस सर्कल/दवर्ली सर्कल ते रावणफोंड सर्कला मेरेनच्या रस्त्याचेर येरादारीचेर पुराय पणान निर्बंध आसतलो जाल्यार पॉवर हावस सर्कल/दवर्ली सर्कल ते ओल्ड स्टेशन रोड सर्कल रस्त्याचेर फकत एम्बुलन्स आनी उजो पालोवपी दळा सारकिल्ल्या एमर्जन्सी गाडयांक प्रवेश आसतलो.
गर्डरांची पुला मेरेन येरादारी आनी ते क्रेनीन खांब्यांचेर चडोवपाचे काम सोमार 20 एप्रीलाक सकाळीं 7.30 ते दनपारां 3.30 वरां मेरेन, मंगळार 21 एप्रील सकाळीं 8 ते दनपारां 3 मेरेन, आनी रातचे 9 ते बुधवार 22 एप्रील सकाळीं 5 मेरेन आनी सांजेची 5 ते बिरेस्तार 23 एप्रीलाक मध्यान रातीं मेरेन, बिरेस्तार 23 एप्रील सकाळीं 6.30 ते दनपारां 2 वरां मेरेन आनी शुक्रार 24 एप्रील सकाळीं 7.30 ते दनपारां 1 वरां मेरेन जातले.
उड्डाण पूल रस्त्याच्या खांब्याचेंर काँक्रिटाच्यो पाटयों (girder) उबारपाचे काम वेळार आनी सुरक्षीत पणान पुर्ण करपा खातीर लोकांनी सहकार्य करचे, असो उलो गोंय राज्य साधनसुविधा विकास म्हामंडळान केला.