भांगरभूंय | प्रतिनिधी
म्हापशेंः तिवायवाडो, कळंगुटे जाल्ल्या वैयक्तीक वादांतल्यान राजभर रविनारायण रामदर्शनभाई (27, सूरत, गुजरात) हाच्या खून प्रकरणांत दुबावीत आदित्य शशिकांत प्रसाद आनी भावेश भोजाराम साहू (भिलाई, छत्तीसगड) हांकां कळंगुटे पुलिसांनी छत्तीसगड सावन अटक केली. म्हापशें न्यायालयान दुबावितांक पांच दीस पुलीस बंदखण दिल्या.
ह्या प्रकरणांतलो मुखेल दुबावीत कोमल उत्तम बरसकार (28, मध्य प्रदेश) हाका घडणुकेच्या दिसा वास्कोच्यान पुलिसांनी अटक केल्ली. तशेंच आयपीएल क्रिकेट बेटिंग खातीर आयिल्ल्या ह्या गटांतल्या आनीक 15 जाणांक कारवाय करून पुलिसांनी अटक तांची जामीनमुक्त सुटका केल्ली. वयले दोगूय दुबावीत घडणुकेच्या थळावेल्यान पळून गेल्ले. ते रेल्वेंतल्यान आपल्या मूळ गांवांत छत्तीसगड पळून गेल्ल्याची म्हायती पुलिसांक मेळिल्ली. ते प्रमाण दुर्ग छत्तीसगडच्या छावणी पुलीस स्टेशनांतल्या पुलिसांनी 14 एप्रीलाक दुबावितांक अटक केली. उपरांत 15 तारखेक कळंगुट पुलिसांनी दुबावितांक ताब्यांत घेवन शुक्रारा 17 तारखेक ट्रांझिट रिमांडाचेर गोंयांत हाडले आनी ह्या खून प्रकरणांत तांकां रीतसर अटक केली. रातीं उसरां दुबावितांक म्हापशें न्यायालयांत हाजीर केले तेन्ना तांकां 5 दीस पुलीस बंदखणींत दवरपाचो आदेश दिलो.
मजगतीं, शेनवारा, 28 मार्चाक सकाळीं सुमार 6 वरांचेर तिवायवाडोच्या सांता मोनिका रिसॉर्टांत ही खूनाची घडणूक घडली. 28 मार्चाक सुरू जावपी आयपीएल क्रिकेट सर्तीचेर बेटिंग करपाक 19 जाणांचो हो पंगड गोंयांत आयिल्लो आनी तिवायवाडो कळंगूटेच्या कासा दी कॅजिनो गेस्ट हावसांत राविल्लो. ह्या पंगडान हॉटेलांत चार कुडी बुक केल्ल्यो.
घडणुकेच्या वेळार मेल्लो राजभर, कोमल आनी वयले दोगूय दुबावीत हे चार जाण कुडी भायर गॅलरींत बसून सोरो पियेताले. आनी हेर आप-आपल्या कुडींत आशिल्ले. सोऱ्याचें घुंवळेंत राजभर आनी कोमल हांचे मदीं वाद जालो. मेल्लो दुबाविताक ताचेर इश्टिणीवेल्यान फकांडा करपाक लागलो. तिचो फोटो दाखोवपाचोय ताणें आग्रो धरलो. दुबावीत कोमल हो फोटो दाखयना म्हूण ताणें इश्टिणी विशीं आक्षेपार्ह आनी अश्लील टिप्पणी केल्यो. हें प्रकरण वाडलें आनी दुबावितान कुडींतल्यान सुरी हाडून मेल्ल्या मनशाचेर हल्लो केलो. राजभर आपलो जीव वाटोवपाक धांवलो. तिगांय दुबावितांनी ताचो फाटलाव केलो. पूण दुबावितांनी राजभराक स्विमिंग पुला लागसार धरलो आनी दुबावितान ताच्या छातयेचेर आनी पोटाचेर सुरयेन हल्लो केलो. तेन्ना ताका थंयच मरण आयलें.
घडणुके उपरांत दुबावीत कोमल बरसकार आनी वयर दिल्ले दोगूय दुबावितांनी पळ काडलो. दुबावीत कोमल भाड्याचे टॅक्सींतल्यान वास्को गेलो. तो रेल्वेंतल्यान गांवांत पळून वचपाचो यत्न करतालो. पूण कळंगुटे पुलिसांनी ताका धरलो. जाल्यार हेर दोग दुबावीत गोंयांतल्यान पळून गेल्ले. ह्या प्रकरणांत पुलीस निरिक्षक लक्षी आमोणकार फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
