भांगरभूंय | प्रतिनिधी
पणजी/नवी दिल्लीः सुमार 500 कोटी रुपयांच्या अर्थीक घोटाळ्याच्या चवकशेंतल्या व्हड तपासात अंमलबजावणी संचालनालयान गोंयांतल्या आलिशान यॉट सयत कांय स्थावर मालमत्तेची वळख करून घेतल्या. ह्यो मालमत्ता गुंतवणूकदारांच्या पयशांच्या गैरवापरांतल्यान विकत घेतल्या असो दुबाव आसा.
परत परत एकूच मालमत्ता विकून फटवणूक
ईडीन 13 आनी 14 एप्रिलाक दिल्ली-एनसीआर, गोंय, जयपूर आनी मुंबयच्या सात सुवातींनी धाड घाली. ही कारवाय करतना रियल इस्टेटा संबंदीत संघटीत ‘पॉन्झी’ पद्दतीच्या फटवणूकांचे पुरावे मेळ्ळ्यांत अशें सांगतात. हे येवजणेंत एकूच ‘व्हर्च्युअल’ वेपारी मालमत्ता परत परत विकून शेंकड्यांनी गुंतवणूकदारांची फटवणूक केल्ल्याचो आरोप आसा.
अधिकाऱ्यांच्या म्हायती प्रमाण, गोंयांतल्या यॉट सयत गुरूग्राम आनी महाराष्ट्रांतली कांय मालमत्ता गुन्यांवांतल्यान मेळिल्ल्या पयशांतल्यान विकत घेतिल्ली असो दुबाव आसा. गुंतवणूकदारांच्या निधींतल्यान लक्झरी जिणेपद्दत सुरु केल्ल्याचो आरोप चवकशे वेळार मुखार आयला.
‘32 व्या अवेन्यू ग्रुप’ आनी ताचे प्रमोटर संचालक अनुभव शर्मा आनी ध्रुव शर्मा हांचे भोंवतणी ही चवकशी केंद्रीत आसा. दिल्ली आनी गुरूग्राम पुलिसांनी तांचे आड गुन्यांव नोंद केल्यात.
अशी फटवणूक जाली
ईडीच्या म्हणण्या प्रमाण, आरोपीनी गुंतवणूकदारांक भाड्याच्या परताव्याची हमी आनी दीर्घकालीन मूल्यवाडीचे उतर दिवन वेवसायीक जागो विकत घेवपाक प्रवृत्त केले. सुरवेक कांय म्हयने भाड्याचे आकर्शक रिटर्न दिवन विस्वास निर्माण करताले. ते उपरांत तीच सुवात नव्या गुंतवणुकदारांक परतून विकून ‘पॉन्झी’ पद्दतीन फटवणूक करताले.
गुंतवणूकदारांचे 500 कोटी वळयले
गुंतवणूकदारांकडल्यान 500 कोटी परस चड पयशे वळयल्यात अशें चवकशेंतल्यान स्पश्ट जालां. ही रक्कम वेगवेगळ्या शेल आनी बेनामी कंपनीं वरवीं वळयल्ली आनी ताचो मूळ स्रोत लिपोवपाचो यत्न केल्ल्याचेय तपासांतल्यान उजवाडाक आयलां.
कोटी रुपयांची रोख, भांगर जप्त
धाडी वेळार 1.05 कोटी रुपया रोख आनी सुमार देड कोटी रुपयांचें भांगर जप्त केला. हाचे भायर कांय बँक खातीं आनी लॉकर गोठयल्यांत, मालमत्ते संबंदीत कागदपत्रां, डिजिटल साधनां आनी हेर पुरावेय जप्त केल्यात.
मजगतीं, ध्रुव शर्मा आनी शिरीन शर्मा हांकां हरियाणा पुलिसांनी अटक करून न्यायालयीन कोठी दिल्या. जाल्यार अनुभव शर्मा आनी ममता शर्मा फरारी आसात अशी म्हायती अधिकाऱ्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
