गोंयांत शिक्षणाचो बाजार जावंक दिनाकात

भांगरभूंय | प्रतिनिधी

आतां सरकाराचें धोरण आसा कोंकणी बगर नोकरी ना. लोक म्हणटात आमी उलयतात ती पुरो ना? फक्त उलयतात तें पुरो जाल्यार आमचें प्रशासन केन्ना कोंकणीतल्यान जातलें?

गोंयकार गोंय सोडून कित्याक वता? हाका राजकारण्यांनी आपले भशेन जाप दिल्या. समाजसेवकांनी आपले भशेन जाप दिल्या. जाल्यार पालक असल्या जापांचेर बेजार जाल्यात. खरी जाप खंय तरी लिपून आसा. एक दीस कोणे एका राजकारण्यान म्हणलें, गोंयकार फास्ट दुडू करचे खातीर विदेशांत वता आनी थंय कसलेंय काम करता. तेंच काम हांगा करूंक लजेता. ह्या विधानाचेर बरीच चर्चा जाली. कांय लोकांनी तिडक लेगीत उक्तायली. कांय गोंयकार फास्ट दुडू करूंक विदेशांत वतात हें सामकें न्हकारूंक जायना, पूण हांगा बेकार रावचे परस पोटाचो प्रस्न सुट्टा थंय वच्चें पडलें जाल्यार कितें चुकलें? पुर्तुगेज पासपोर्ट करपाची सोय आशिल्ली म्हूण गोंयकारांक ही संद उपलब्द जाली, हाची आमकां व्हडवीक दिसूंक जाय आशिल्ली. ती सोय आशिल्ली म्हूण कितले बेकार लोक लंडनाक पावले. ते बऱ्याक पावले म्हूण कांय राजकारण्यांच्या पोटांत दुखलें. गोंयकार शिकल्यात, तांकां हांगा नोकरी खंय आसा? गोंयांत बऱ्यो- बऱ्यो कॉलेजी आसात, हजारांनी भुरगीं थंय शिकतात. पूण तातूंतल्यान पदवी घेवन भायर सरतकच नोकरी मेळटा? देख म्हज्या पुताची दितां. ताणें वेर्णेंच्या पाद्री कॉन्सेसांव कॉलेज ऑफ इंजिनियरींग हांगाच्यान इजिनेराची पदवी घेतली. आतां पांच वर्सां जायत आयलीं, तो बेकार आसा. कितलीं भुरगीं टिचरीचें शिकप घेवन बेकार आसात. कितलीं भुरगीं फार्मासी कॉलेजींतल्यान पदवी आनी पदविका घेवन बेकार आसात. ह्या भुरग्यांनी कितें करपाचें? घरांत बसून रावपाचें? सगल्याच पालकांक परवडटा वाडिल्ल्या भुरग्यांक घरांत बसोवन पोसूंक?
दोन दीस आदीं, एके नांवाजत्या कॉलेजीच्या प्राचार्याक मेळ्ळों. भुरग्यांच्या फुडारा विशीं विशय आयलो तेन्ना ताणें सांगलें, एक वर्स फाटीं केप्यां पारूल युनिव्हर्सिटी सुरू जाली आनी ह्या शिक्षणीक वर्सा सावन आनीक एक युनिव्हर्सिटी सुरू जावपाची आसा. ते उपरांत आनीक तीन तरी बरी साधनसामुग्री आशिल्ल्यो युनिव्हर्सिटी गोंयांत येवपाच्यो आसात. हें अशें कित्या खातीर घडटा ताचेर कोणें लक्ष दिलां? आमच्या गोंयात एक युनिव्हर्सिटी आसतना ह्यो आनीक युनिव्हर्सिटींची गरज आसा? तातूंत जे विशय शिकयतात, तेच विशय शिकोवपी हांगा कितल्यो कॉलेजी आसात, तांची हालत कितें जातली? अकस्मात गोंयांत भुरगीं वाडपाचीं आसात? एक बारीक विचार करपाची गरज आसा. ह्या सगल्या युनिव्हर्सिटींक सरकाराचो तेंको आसा. गोंयांत जियेतात तांची जोड बरी आसा हे तांणी वळखलां. म्हणून नव्यो-नव्यो युनिव्हर्सिटी गोंयांत गुंतवणूक करूंक तांणी पावलां मारल्यांत. ह्यो खासगी युनिव्हर्सिटी आपल्या दुडवांची लुकसाणांत गुंतवणूक करतात. कित्याक तांकां खबर आसा, हे दुडू भुरगीं न्हय जाल्यार गोंय सरकार परतून मेळोवन दितलें म्हूण. भुरग्यांक नाकरेचीं हायसां दाखोवन ते भुरग्यांक भुलयतात. गोंयांत जावं हेर कडेन नोकरी दिवपाची ते हमी दितात. पालकांकूय आस्त जाता आनी तेवूय फियेच्या रुपान दुडवांची गुंतवणूक करतात. बऱ्या गुणांनी पास जातात तांकां नोकरी मेळटा हें खरें पूण अशक्त आसात तांचें कितें?
प्राचार्यान संक्षेप करतना सांगलें, ‘गोंयांत शिक्षणाचो बाजार जाला तो थांबना जाल्यार शिक्षणाची वेवस्थापनां लूट मारतलीं आनी गोंयकारांचो दुडू भलतेच घेवन वतले. पुर्तुगेज गोंयांतल्यान गेले उपरांत म्हळ्यार गोंय मुक्त जाले उपरांत गोंयची शिक्षणीक उदरगत जातली अशें धरिल्लें, पूण ताचेर अभ्यासूच जालो ना आनी घसघशांनी मराठी शाळा सुरू जाल्यो. खरें म्हळ्यार ह्यो कोंकणी शाळा सुरू जावंक जाय आशिल्ल्यो. जाल्यार आयज गोंयची राजभास मराठी जावची म्हूण तरी बोवाळ जावचोच नाशिल्लो. जालें ताका रडून फायदो ना पूण त्यो सवका सवका बंद पडपाक लागल्यात तांचे खातीर तर रडचेंच पडटलें. हे जावंक मुखेल कारण जावन आसा खासगी शाळांचे अवतरण, खूब जणांक दिसता खासगी शाळा आयिल्ल्यान भुरग्यांचो फुडार बरो जालो. बरो जालो म्हळ्यार भुरग्यांक विदेशांत धाडूंक तीं तयार जालीं. अशें म्हणटना आमी कोंकणीक आनी गोंयाक फाट करतात अशें जालें ना?
शंबर टक्के नोकरी दिवपी कॉलेजी गोंयांत नात. नोकऱ्यो दिवपी युनिव्हर्सिटी गोंयांत असली फुसलावणी दितात. मराठी शाळा सुरू जाल्ल्यो तेन्ना अशीच फुसलावणी जाल्ली. म्हूण कोंकणी शाळांची मागणी आसुनूय मराठी शाळा उरल्यो. हीच गजाल अनुदानीत शाळां विशीं घडली जेन्ना तांकां कोंकणी विशय शिकोवंक घेवचो पडलो, तेन्ना गोंयच्या शाळांनी मानून घेतलें सरकाराचें अनुदान मेळोवंक. कायदे आपणाक जाय तशे घोळोवन घेवंक वेवस्थापनां तयार आसतात. आयज सगल्यो अनुदानीत शाळा कोंकणी शिकयतात? आठवी यत्ते सावन कोंकणीची कसली हालत जाता तें पळयात. कितल्या शाळांनी तिसरो विशय कोंकणी आसा? आतां सरकाराचें धोरण आसा कोंकणी बगर नोकरी ना. लोक म्हणटात आमी उलयतात ती पुरो ना? फक्त उलयतात तें पुरो जाल्यार आमचें प्रशासन केन्ना कोंकणीतल्यान जातलें?
हाका बरी देख घेवं येता ती नेपाळचे नवे प्रधानमंत्री बालेन शाह हाची. ताणें शिक्षणीक मळार क्रांतिकारी पावलां मारल्यांत आनी सगल्या शिकपी भुरग्यांक सरकारी शाळांनी भरती जावंक उलो मारला. हाचो अर्थ ताणें खासगी शाळांचेर बंदी हाडल्या. अशें करपाची गोंयाक कापाझदाद आसा? कांय दीस आदीं, हांव पणजेच्या भितरल्या भागांनी भोंवतालों. थंय बिल्डिंगो उब्यो जाल्यात तांचो हिशोब ना. हेच गोंयभर चल्लां. ह्या बिल्डिंगांनी कोण रावता? बिगर गोंयकार. मागीर आमच्या गोंयांत उदरगत जाता ती बिगर गोंयकारांची. तांचे खातिरूच येतात त्यो नव्यो नव्यो युनिव्हर्सिटी. तेवूय पयसो ओतोवंक तयार आसात. तातूंत गुणवत्ता शिक्षण मेळटलें काय ना तें खबर ना. पूण एके नांवाजते युनिव्ह‌‌र्सिटीच्या नांवाची म्होर आसतली न्हय? ह्या भुरग्यांकूच गोंयांत नोकरी मेळत, कित्याक तर लाखांनी मोडून ते शिकतात. मागीर गोंयकारांनी विदेशांतूच वच्चे पडलें ना? म्हूण म्हणटां, गोंयांत शिक्षणाचो बाजार जावंक दिनाकात.

विन्सी क्वाद्रूस
9822587498