पालिका वेंचणुको विधानसभा वेंचणुके उपरांत

भांगरभूंय | प्रतिनिधी

दीर्घ प्रक्रिये खातीर सरकाराचो अध्यादेश

भांगरभूंय । प्रतिनिधी

पणजी : विधानसभा वेंचणुके आदीं इकरा नगरपालिकांच्यो वेंचणुको घेतल्यो जाल्यार कार्यकर्त्यांची नाराजी विधानसभा वेंचणुकेंत जड वतली, हाचो विचार करून सरकारान ह्यो वेंचणुको फुडें धुकलपा खातीर युक्त सोदून काडल्या. नगरपालिकांच्या प्रभागांची फेररचणूक, आरक्षण हे विशींचे अधिकार परतून राज्य वेंचणूक आयोगाक दिल्यात. हे प्रक्रिये खातीर आयोगाक उण्यांत उणे स म्हयने लागतले. ताका लागून विधानसभा वेंचणुके आदीं नगरपालिकांच्यो वेंचणुको जावच्यो नात, हें स्पश्ट जालां.

सरकारान अध्यादेशांत कांय म्हत्वाचे बदल आस्पावीत केल्यात, ते प्रमाण गोंय नगरपालिका कायद्याच्या 9, 10 आनी 11 त बदल करून फेररचना करतना लोकांच्यो हरकती मागोवप, ते उपरांत ताचेर प्रक्रिया करून फेररचनेची निमाणी अधिसुचोवणी काडप, ते उपरांत आरक्षणा खातीर लेगीत तशेच तरेची प्रक्रिया करप, हातूंत आयोगाक उण्यांत उणे पांच ते स म्हयने लागतले. ते उपरांत वेंचणुकांची प्रक्रिया करप. ही सगली प्रक्रिया पळयत जाल्यार विधानसभा वेंचणुके आदीं पालिकांच्यो वेंचणुको जावप अशक्य आस. ते खातिरूच पालिका प्रशासना कडले अधिकार राज्य वेंचणूक आयोगाक दिवपाचो अध्यादेश तयार केला, अशी म्हायती सुत्रांनी दिल्या.

दोन दिसां आदीं पालिका वाठारांतल्या आमदारांची मुख्यमंत्र्यान बसका घेतली. ते बसकेंत सगल्याच आमदारांनी वेंचणूक फुडें धुकलपाची मागणी केली. विधानसभा वेंचणुके उपरांतूच गोंयांत पालिकांच्यो वेंचणुको घेवच्यो, अशी मागणी आमदारांनी केल्ल्यान सरकारान 24 वरां भितर अध्यादेश तयार करून ताका मंत्रीमंडळाची मान्यताय मेळयली.

सरकारांतल्या सुत्रांनी दिल्ले म्हायती प्रमाण सरकाराक विधानसभा वेंचणूक डिसेंबरा मेरेन अपेक्षीत आसा. ताका लागून ताचे आदीं पालिकांच्यो वेंचणुको घेतल्यो जाल्यार उमेदवारी दिवपा वयल्यान आमदारांच्या कार्याकर्त्यांची नाराजी ओडून घेवची पडटली, हाची कल्पना सरकाराक आसा. तेच खातीर वेंचणुको फुडें धुकलपाची येवजण आंखल्या.

मजगतीं, अध्यादेशांत गोंयांतल्यो पालिका, पंचायत, जिल्हो पंचायतीच्या वेंचणुकां खातीर सगल्यो प्रक्रिया हाचे मुखार राज्य वेंचणूक आयोग करतलो, अशी तजवीज केल्या. ताका लागून प्रभाग फेररचना, आरक्षण ह्यो सगल्यो प्रक्रिया राज्य वेंचणूक आयोग करतलो.

फोंडें आनी सांखळी नगरपालिका सोडून हेर इकरा पालिकांच्यो वेंचणुको मे म्हयन्यांत जावपाची शक्यताय आशिल्ली. तांची मुजत त्याच वेलार सोंपता, पूण सध्या सरकारान दिवचल, वाळपय, काणकोण, कुंकळ्ळी, पेडणें आनी कुडचडें- काकोडें अशा स पालिकांचेर प्रशासक नेमल्यात. उरिल्ल्या म्हापशें, मुरगांव, मडगांव, केपें, सांगें पालिकांचेर प्रशासक नेमपाची प्रक्रिया चालू आसा.

मजगतीं, सगल्या थळाव्या स्वराज्य संस्थांच्यो वेंचणुको घेवपाचे सगले अधिकार राज्य वेंचणूक आयोगाक दिल्यात, अशें मुख्यमंत्री डॉ. प्रमोद सावंत हांणी भांगरभूंय कडेन उलयतना सांगलें. मजगतीं, ते संबंदीचो अध्यादेश लेगीत काडिल्लो.

गोंयचे अॅडव्होकेट जनरल देविदास पांगम हांणी गोंयांतल्यो पालिकांच्यो वेंचणुको लांबणेर पडपाक शकता, अशें स्पश्ट सांगलें. फेररचना, आरक्षण हाची प्रक्रिया करचे खातीर राज्य वेंचणूक आयोगाक वेळ जाय, ताका लागून वेंचणुको फुडें धुकलते, अशें तांणी सांगलें. दिवचलचे आमदार डॉ. चंद्रकांत शेट्ये हांणी हे विशीं उलयतना पालिकांच्यो वेंचणुको घेवचे खातीर सरकारान गडबड करची न्हय, अशें आपणे मुख्यमंत्र्याक सुचयलां, अशें सांगलें.