भांगरभूंय | प्रतिनिधी
पणजी : वयलोवाडो- हरमल, पेडण्यां वाठारांत बिबट्याच्या वावराक लागून लोकां मदीं भंय निर्माण जाला. मंगळारा उसरां रातीं एका घराच्या व्हरांडांतल्यान बिबट्यान सुण्याक उखलून व्हेल्ल्याची घडणूक घडली.
ही पुराय घडणूक घराच्या सीसीटीव्ही कॅमेर्यांत कैद जाली. हातूंत बिबटो शांतपणान येवन सुण्याक व्हरता तें स्पश्टपणान दिसता. हे घडणुके उपरांत थळाव्या नागरिकां मदीं भंय पातळ्ळा. ल्हान भुरगीं आनी पोशिल्ल्या जनावरांचे सुरक्षितताये विशीं चिंता उक्तायल्या.
मजगतीं, वनविभागाक हे विशीं म्हायती दिल्या. बिबट्याचो बंदोबस्त करपा खातीर गरजेचीं पावलां उबारपाची मागणी ग्रामस्थांनी केल्या. नागरिकांनी रातच्या वेळार शिटूक रावचें आनी भायर पडटना गरजेची खबरदारी घेवपाचो उलोय मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
