भांगरभूंय | प्रतिनिधी
सैमान नटिल्ल्या गोंयाक सर्ग म्हणटात. मात, आयज गोंयची ही प्रतिमा इबाडत आसा. गोंय गैरसमजांचो सर्ग काय मिश्र संस्कृतायेचें दायज हेंच कळना. भायल्यान येवपी बऱ्याच पर्यटकांक तर गोंय म्हणल्यार ‘खाओ, पिओ, मजा करो’ अशेंच दिसता. झोळयांक बुराक पड मेरेन चमचमीत खावप, पावलां उडोवपाक जमना इतलो सोरो पियेवप, हाॅस्पिटलांत पडसर घुंवळे वखदां चाखप, पश्चिमी संगिताच्या तालार नाचप आनी शिंदळके वांगडा ‘जिवाचो गोवा’ करप! तातूंत आतां जुगारूय मातला. आंबटशौकी पर्यटकांच्या तोंडी प्रचारान गोंयचें नांव घाण जालां, हें वेगळें सांगपाक नाका.
पयर एके विदेशी बायले कडेन बुरशें उलोवन तिचो विनयभंग करतनाचो व्हिडियो व्हायरल जालो. तो देड वर्स आदलो. चार दिसां पयलीं अपलोड केल्लो. व्हिडियो ब्लर करूंक नाशिल्ल्यान बायलेची वळख उक्ती जाली आनी पर्यटकांची खाजगी जीण, बायलांचे सुरक्षीततायेचो प्रस्न मुखार आयलो. गोंयांत चली सांपडल्यार कितें जावं येता, ताचो हो पुरावो. एकोड्या चलयांचेर बलात्कार, खून जावपाचे प्रकार घडल्यात. देशांतूच न्हय, तर पुराय संवसारांत ते गाजल्यात. ह्या व्हिडियोक लागून चुकीचे संदेश गेल्यात. आतां तो काडपी पर्यटकाक उत्तर प्रदेशांतल्यान धरून हाडला. ते बायलेचो विनयभंग करप्यांचो सोद पुलीस घेतात. गोंयांत पर्यटक दिसलो रे दिसलो काय भायले दलाल धांवत येवन ताका ‘मंगता है क्या?’ म्हूण विचारतात. पर्यटन मळा वयल्या भागधारकांनी हाचेर नियंत्रण हाडलें ना जाल्यार फुडल्या चार वर्सां भितर, गोंयांत फक्त असलेंच आसा, असो गैरसमज जातलो. ताचो कितलो व्हडलो फटको तिजोरेक बसतलो? खणी बंद जाल्यात तशें पर्यटन बंद जावचें न्हय. अप्रचार सुरू जातकच आमी ‘टुल किट’ म्हूण हड्डें बडयतात. ताचे परस हात, पांय हालोवन हे गैरप्रकार बंद करूंक जायना?
बागांत घडिल्ल्या ह्या प्रकाराक लागून पुलिसांनी व्हिडियो करप्याक अटक केल्या. सबस्क्रायबर वाडोवपाक तो सोशल मिडियाचेर घालो, अशें ताणें सांगलें. देड वर्सां पयलींच ताणें तो गुपचूप पुलिसांक दिल्लो जाल्यार ह्या गैरप्रकारांक थोडो आळाबंद बसपाचो. गोंयचें पर्यटन हें फॅमिली डेस्टिनेशन जावचें. न्हय, वायट गजालींचें थळ. हांगाची आगळी संस्कृताय, दायज, उरला तो सैम हाचे कडेन पर्यटकांचें लक्ष ओडचें. कुटुंबां, आंतरराष्ट्रीय उंचेल्या पांवड्या वयले पर्यटक उणे जाल्यार पर्यटनाचो पांवडो देंवता. सोरो, ड्रग्स, शिंदळकी वाडल्यार गुन्यांवकारी जग जागें जातां. ताचो तरणाट्यांचेर परिणाम जाता. समाजूय इझी मनीच्या फाटल्यान लागता. सरकारी यंत्रणांक सूर, रोंट घालो काय भिवपाची गरज ना, हाची तांकां खात्री जाता. हणजूणें उजो प्रकरणांत हाचे पुरावेय मेळ्ळे. परवाने नासतना क्लब, पब चलताले. थळाव्या बायलांक सकयल्या पांवड्याचें पर्यटन धोक्याचें थारूंक शकता. ह्यो गजाली झटपट पयसो मेळोवन दितात, मात चड काळाचें लुकसाण करता. धर्मीक थळां, सैम, दर्यावेळो, बरो इतिहास, संगीत, खाणां- जेवणां हाचेर चड भर दिवपाक जाय.
पर्यटन मळा वयल्यो अपप्रवृत्ती काबार करतलो जाल्यार कायदो कडकपणान चालीक लावचो. ड्रग्स, वायट गजालींचेर खर लक्ष दवरचें. तो थोड्यांचो अर्थीक स्रोत जावचो न्हय. वेळेर, देगांचेर जें कितें आसा, ताची नेमान तपासणी जाय. सोशल मिडियाचेर सकारात्मक, बरें गोंय दिसचें. खास करून हो मजकूर, व्हिडियो हिंदींत आसचो आनी देशभरांत पावचो. फक्त सरकारी यंत्रणाच न्हय, तर जांचे 20 हजारां वयर फाॅलोवर आसात, त्या सगल्यांनी समाजसेवा, लागणूक हे नदरेन गोंयच्या बऱ्या गजालींचो प्रचार करूं येता. खास करून जांचे गोंय भायर आनी बिगर गोंयकार फाॅलोव्हर आसात तांणी. म्हायती तंत्रज्ञानाच्या काळांत तरी गोंयचो अप्रचार जावप समा न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
