भांगरभूंय | प्रतिनिधी
झिम्बाब्वेच्या शिश्टमंडळान केली मुख्यमंत्र्यां कडेन चर्चा
पणजी: गोंयांत रोबोटीक आनी एआय शिक्षणांत म्हत्वाचें योगदान दिवपी क्युरियस मायंड इन्फोटेनमेंट ह्या स्टार्टअप कंपनीची निवड झिम्बाब्वे सरकार रोबोटीक प्रशिक्षण दिवपा खातीर केल्या. हाका लागून ही स्टार्ट अप कंपनी झिम्बाब्वेंतल्या विद्यार्थ्यांक रोबोटीक तशेंच एआयचे धडे दितली. गोंया खातीर ही अभिमानाची गजाल आसा, अशें मुख्यमंत्री डॉ. प्रमोद सावंत हांणी सांगलें.
विज्ञान, तंत्रज्ञान, अभियांत्रिकी, गणीत, रोबोटिक्स आनी एआय (स्टेम) शिक्षणाच्या मळार गोंय दिसान दीस उदरगत करीत आसा. संवसारीक मळार लेगीत गोंयच्या संस्थांक नामना मेळपाक लागल्या.
क्युरियस मायंड इनफोटेनमेंट लिमिटेड ही गोंंयची स्टार्टअप कंपनी रोबोटिक्स आनी एआयचें शिक्षण तशेंच प्रशिक्षण दिता. ते भायर हे कंपनीन तरेकवार उपकरणां लेगीत तयार केल्यांत.
रोबोटिकाचें प्रशिक्षण दिवपी प्रशिक्षकां खातीर प्रशिक्षण दिवपाक झिम्बाब्वे सरकारान क्युरियस मायंड इन्फोटेनमेंट स्टार्टअप कंपनीक मान्यताय दिल्या. तशेच कंपनीची उपकरणां आनी साहित्य शिक्षणा खातीर वापरपाची मान्यताय दिल्या. रोबोटीक आनी एआय कार्यावळींत झिम्बाब्वे सरकारान क्युरियस मायंड इन्फोटेनमेंट कंपनीक भागिदार केला.
गोंयची निर्मिती तशेंच कल्पनाक आतां संवसारीक मळार मान्यताय मेळपाक लागल्या, हाचें हें एक बेंस बरें उदाहरण आसा, अशें मुख्यमंत्र्यांनी म्हणलें.
झिम्बाब्वे सरकारच्या शिश्टमंडळान बिरेस्तारा मुख्यमंत्री डॉ. प्रमोद सावंत हांची भेट घेवन रोबोटिक्स आनी एआय कार्यावळींतल्या भागिदारी विशीं चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
