भांगरभूंय | प्रतिनिधी
लग्न हें खरें म्हाणल्यार एकदांच करचें आसता. संवसार हो जल्मभराचो आसता. लग्न हें दोन आत्म्यांचें मेळप आसले तरी, तातूंतल्यान दोन घराण्याचें जुळप जाता.
राहुल-सुमीच्या लग्नाचो सुवाळो व्हड दबाज्यान चलतालो. लग्नांत वेगळ्या वेगळ्या गांवांतल्यान, वेगळ्या वेगळ्या जाती धर्माचो लोक आयिल्लो. शारांतल्या एका व्हड हाॅलांत हो लग्न सुवाळो चलतालो. एप्रील म्हयनो, कडकडीत वत, गरमी सोंसूंक जायना आसली. पावसूय पडपाचीं कांयच खुणाय दिसनाशिल्ली. सेन्ट्रल एसी आसूनय गरमेचेर मात करूंक जायना आसली. लग्नांत केल्लें डॅकोरेशन सुंदर आनी सुबक अशें आसलें. सगल्यांचेंच लक्ष तें आपले कडेन ओडून घेतालें. भटजीन घांट वाजयली म्हणजे लग्नाच्या म्हुर्ताचो वेळ जालो आनी सगल्यांची नदर परतून सजयिल्ले माचयेर घुंवली. भटजीन मंत्र सुरू केले आनी व्हंकल न्हवऱ्याच्या पदराची गांठ बांदली, तांच्या माथ्यार अक्षता पडली.
राहुल-सुमीच्या लग्नांत कांय गजाली अश्यो आसल्यो त्यो हेरांच्या लग्ना परस वेगळ्योच. लग्नांत सुरय तांदूळ पिंजरींत भोरसून ते तांदूळ रंगीत करता आनी ते रंगयिल्ले तांदूळ अक्षता म्हणून वापरता. पूण, राहुल-सुमीच्या लाग्नांत अक्षता तांदळाची नाशिल्ली. ती आशिल्ली फुलांच्या पाकळ्यांची. कित्याक तर ‘अन्न हें पुरायेन परमात्मो ‘ अशें म्हणटात आनी तांदूळ म्हणल्यार अन्नाचोच एक प्रकार, तें लोकाच्या पांयांपोंदा पडून अन्नपुर्णा देवीचो अनादर जावचो न्हय म्हणून हो उपाय राहुलाक यवजलो आसतलो.
गरमेचे दीस आशिल्ल्या कारणान थंड पियेवपाची गरज तर सगल्यांकूच आसता. पूण राहुल- सुमीच्या लग्नांत साॅफ्टड्रींक नासलें. लोकांची तान भागोवपा खातीर मॅंगो फ्लेवर रसना केल्लें. हें रसना साॅफ्टड्रींकाचो खर्च चड वडटा म्हणून करूंक नासलें. पूण साॅफ्टड्रींक पियेल्यार गॅस जाता म्हणून… आनी गॅसान खूबशा लोकांक त्रास जाता हें राहुलाका समजतालें. जेवणाचे बुफेक खूबशे डीश दिसताले पूण त्या डिशींनी फावो तितलेंच जेवण आसलें. विनाकारण जेवणाची नासाडी जावची न्हय हो हाचे फाटलो राहुलाचो हेत आसलो.
लोकांची गर्दी व्हड, जेवण आसले रुचीक चड. लोक पोट भरून जेवताले. चार पांच ग्लास पियेवन लेगीत रसना, कांय जाण म्हणटाले रसना पोटांत वचना. पळयतां पळयतां जेवणाची कार्यावळ सोंपली. पूण उरिल्लें जेवण हें सगलें गोरीब भुकेल्यांक दिवचें अशें राहुलान कॅटरींग वाल्याक पयलींच सांगून दवरिल्लें. कॅटरींग वाल्यान उरिल्ल्या जेवणाचें पार्सल करून दवरिल्लें. लग्नांतलें महान कार्य सोंपलें खरें पूण पांच दिसाची रीत ती तर करूंकच जाय. न्हवऱ्या वटेंतलें पांच जाण आनी व्हकलें वटेंतलें पांच जाणांक माचयेर आपयली आनी होंटी बी भरून, वायणां बी दिवन पांच दिसाची रीत बेगिनूच सोंपयली आनी परतवणाचे वाटेक लागलीं.
न्हवरो व्हंकलेक घेवन घरा आयलो. घरांत भितर सरचे पयलीं आमच्या जाणट्यांची कांय प्रथा आसा ती अशी…
न्हवऱ्याक-व्हंकलेक भितर घेवचे पयलीं कांय जाणट्यो बायलो एकठांय जावन पदां म्हणटात आनी तीं पदां अशीं…
‘खंय पावलो काय… खंय गेलो? खंय पावलो काय… खंय गेलो? न्हवऱ्याचो बापोलो, दिवो असो तापोलो… दिव्यांत तेलू घाला. दिवो असो तापोलो… दिव्यांत तेलू घाला.’ अशीं हीं पदां अयकूंक खूब बरीं दिसतात अनी त्या पदांची चालूय बी वेगळीच आसता. अशींच आनीक कांय पदां आसात.
‘पेरां हाड गे पेरकान्नी… पेरां हाड गे पेरकान्नी, फुलां हाड गे फुलकान्नी… भितर सर गे घरकान्नी आमचे व्हंकले बाये… भितर सर गे घरकान्नी आमचे व्हंकले बाये.’ हें पद व्हंकलेक भितर काडटात तेन्ना म्हणटात. आतां फुडें एक पद म्हणटात तें अशें..!
‘आरती काय परती… कोंकण बांयचें.. गे पाणी, कोंकण बांयचें गे पाणी.. पांये ईशे धुयता गे आमची यजमानी… पांये ईशे धुयता गे आमची यजमानी… अशीं हीं पदां म्हणून न्हवऱ्याक-व्हंकलेक भितर काडटात. भितर काडून च्या पाणी जाले उपरांत व्हंकलेलो लोक आपआपल्या घरा वता.
आतां बाशींग सोडपाचो कार्यक्रम सुरू जाता. ह्या कार्यक्रमांत भुरग्यांची तशेंच व्हडल्यांची खूब मजा. व्हंकल न्हवरो बाशींग सोडटा. भुरगी व्हंकलेचो पदर ओडटा. ऐकामेकाचेर केळ्याच्यो साली शेंवटून मारतात. जबरदस्तीन केळीं खावयतात, कोण सिनेमांतली पदां म्हणटात तर कोण कोणाची नक्कल करतात. अशें करून बाशींग सोडपाचोय कार्यक्रम सोंपता आनी रातच्या वेळार माशेंचें जेवण म्हणल्यार नुस्त्या जेवणाक सुरवात… दोन दीस शिवराक जेवले उपरांन लग्नाचे रातीक नुस्त्याचें जेवण जेवपाची प्रथा कांय लोक अजुनूय पाळटात.
राहुल-सुमीलें लग्न हें परतून परतून येवचें अशें जायतें जाणाक दिसतालें. कित्याक तर सगल्यांनीच लग्नांत बरीच मजा केल्ली दिसताली. पूण, लग्न हें खरें म्हाणल्यार एकदांच करचें आसता. संवसार हो जल्मभराचो आसता. लग्न हें दोन आत्म्यांचें मेळप आसले तरी, तातूंतल्यान दोन घराण्याचें जुळप जाता. आतां पळोवया पांच दिसांचें आपोवणें केन्ना येता तें…!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
