भांगरभूंय | प्रतिनिधी
शिरगांव जात्रा : दोन दिसांत जातलो नियंत्रण कक्ष
पणजी : शिरगांव जात्रेच्या पयल्या दिसा जावपी गर्दीचेर नियंत्रण दवरपा सयत सुरक्षा स्थितीचो नियाळ घेवपा खातीर प्रशासना वतीन खासा नियंत्रण फाटो स्थापन जातले. ह्या नियंत्रण फाट्यार जात्रेच्या दोन दिसां खातीर कायमस्वरूपी अधिकार्यांची नेमणूक जातली. आपत्कालीन स्थिती तयार जाली जाल्यार ह्या नियंत्रण फाट्यावरवीं सगळ्या यंत्रणेक गरजेच्यो त्यो सुचोवण्यो जारी जातल्यो. शिरगांवच्या लयराई देवीची जात्रा अंदू २१ एप्रिलाक जातली. फाटले वर्सा खेटाखेटींत ६ जाणाक मरण आयिल्ल्यान अंदू सरकार तशेंच प्रशासनान सादनसुविदा तयार करपा सयत सुरक्षा उपाय खर केल्या.
उत्तर गोंयचे जिल्होधिकारी अंकीत यादव हांणी ही म्हायती दिली. नियंत्रण फाट्या खातीर शेड उबारपाचो वावर सुरू जाला. दोन दिसांत भौशीक बांदकाम खात्यावरवीं शेडीचें काम पुराय जातलें. जात्रेच्या दिसा ९२ सुवातींचेर सीसीटीव्ही कॅमेरे बसयतले. सीसीटीव्ही कॅमेर्यांची स्क्रीन नियंत्रण फाट्यात आसतली. पुलीस म्हासंचालक, उत्तर गोंय जिल्होधिकारी, दिवचलचो उपजिल्होधिकारी, मुखेल सचिव ह्या सगळ्या जाणांक पुराय वाठाराच्या स्थितीचे दर्शन जातलें. एखाद्या सुवातेर गर्दी चड जाली जाल्यार पुलीस निरीक्षकांक आदेश दिवन ती पयस करपाची वेवस्था जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
