भांगरभूंय | प्रतिनिधी
सांगोल्डा सायबर क्रायम पुलिसांची कारवाय
पणजी : आयपीएल सर्तीचेर व्हडा प्रमाणांत ऑनलायन सट्टेबाजी सुरू आशिल्ल्याचें दिसून आयलां. सांगोल्डा सायबर क्रायम पुलिसांनी घातिल्ले धाडींत आयपीएलाचेर ऑनलायन बॅटींग रॅकेट उक्तडार हाडलें. ह्या प्रकरणांत पुलिसांनी स जाणांक अटक केली.
१५ एप्रिलाक रातच्या सुमार ९ वरांचेर धाड घातली. ही कारवाय मध्यानराती मेरेन सुरू आशिल्ली. हे धाडींत दुबावितां कडल्यान ६ लॅपटॉप, ३१ हजार रुपया रोख, ५० एटीएम कार्ड्स, खुबशे म्युल अकावंट किट्स, मोबायल फोन असो सुमार १० लाख रुपयांचो मुद्देमाल जप्त केलो.
दुबावीत ‘एमजी लायन’ आनी ’काबुक १’ ह्या बॅटींग ऍप्सां वरवीं विवीध मोबायल आनी वाय-फाय कनेक्शनाचो वापर करून क्रिकेट सट्टा स्विकारताले. तशेंच विवीध नांवान नोंदणीकृत खात्यांवरवीं पयशे फिरोवन जुगाराचो अड्डो चलयताले, अशें तपासांत उक्तें जालें.
अटक केल्ल्या दुबावितां मदीं गुजरात, राजस्थान आनी पश्चीम बंगालच्या स जाणांचो आसपाव आसा. गेडिया राज दिलीपभाई (सूरत, गुजरात), भीमराज मीना (उदयपूर, राजस्थान), निलेश हिराणी (सूरत, गुजरात), शनि दीपकभाई चावडा (सूरत, गुजरात), रोकड यश जयसुखभाई (अमरेली, गुजरात) आनी प्रशांत त्रिवेदी (बर्धमान, पश्चीम बंगाल) अशीं तांचीं नांवां.
ह्या प्रकरणांत सगल्या दुबावितां आड म्हायती तंत्रज्ञान कायद्याच्या कलम ६६-सी सयत भारतीय न्याय संहिता कलम ३(५) तशेंच गोंय पुलीस जुगार प्रतिबंधक कायद्याच्या कलम ३ आनी ४ खाला गुन्यांव नोंद केलो. सायबर क्रायम फांट्याचे पुलीस अधीक्षक राजू राऊत देसाय हांच्या मार्गदर्शनाखाला पुलीस निरीक्षक दीपक पेडणेंकार, उपनिरीक्षक नवीन नायक तशेंच हेरांनी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
