भांगरभूंय | प्रतिनिधी
भारताचो युवा स्टार बॅडमिंटन खेळगडो लक्ष्य सेनान संवसारीक बॅडमिंटन वस्तादपण सर्तीचे प्री क्वॉर्टरफायनलींत सुवात मेळयली. तशेंच ध्रुव कपिला-अर्जुन हे जोडयेन लेगीत जैत जोडलें. पूण, किदाम्बी श्रीकांत तिसरे फेरयेंत हारलो.
णव्या सिडा वयल्या लक्ष्य सेनान स्पेनाच्या लुईस एनरिकाक 21-17 आनी 21-19 अशा सरळ गेमींनी हारयलो. प्री क्वॉर्टरफायनलींत तो भारताच्या एच एस प्रणय आनी जपानाच्या केंतो मोमोता हांच्या मदल्या जैतिवंता आड खेळटलो.
दादल्यांचे आनीक एके मॅचींत 12वे सुवाते वयल्या किदाम्बी श्रीकांताक चीनाचो बिगरसिडा वयलो खेळगडो झाओ जून पेंग कडल्यान 9-21 आनी 17-21 अशा सरळ गेमींनी हार घेवची पडली.
ध्रुव-अर्जुन जोडयेक जैत
दादल्यांच्या दोट्टी गटांत ध्रुव कपिला-अर्जुन हे जोडयेन जैत जोडलें. भारताचे जोडयेन डॅनमार्काचे किम स्टूप आनी अॅण्ड्रस रेसमुसेन हे जोडयेक 21-17 आनी 21-16 अशा फरकान हारयली. ह्या जैता सयत ध्रुव-अर्जुन ही जोडी प्री क्वॉर्टरफायनलींत सुवात मेळोवपाक येसस्वी थारली. बायलांच्या गटांत भारताक हार घेवची पडली. चीनाचे चीन किंगचेन आनी जियो यी हे जोडयेन भारताचे आश्विनी पोनप्पा एन सिक्की रेड्डी हे जोडयेक 21-15 आनी 21-10 अशा फरकान हारयली. ते उपरांत तृषा जॉली-गायत्री गोपीचंद हे जोडयेक थायलॅण्डाचे टेन पियरले-टी मुरलीधरन हे जोडये कडल्यान 21-8, 21-17 फरकान हार घेवची पडली.
सायना नेहवाल फुडले फेरयेंत
भारताची स्टार बॅडमिंटन खेळगडी सायना नेहवालान पयल्या 16त सुवात मेळयली. दुसरे फेरयेंत तिची मॅच जपानाचे नोओमी ओकुहारा आड जावपाची आशिल्ली. पूण, जपानाचे खेळगडयेन दुखापतीक लागून सर्तींतल्यान फाटीं सरपाचो निर्णय घेतलो. तिणें पयले फेरयेंत हॉंगकॉंगचे चेउंग एनगान हिका 21-19 आनी 21-9 अशा सरळ गेमींनी हारयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
