तांच्या कर्तुबांचेर मर्यादा कित्याक घालच्यो ?

भांगरभूंय | प्रतिनिधी

ह्या अनुदानीत शाळांनी नव्या शिक्षकांची भरती कायम स्वरुपी करून तांच्या पोटा पाणयाची वेवस्था करची. जेणे करून हे शिक्षक….

विद्यार्थ्यांची निमाणी परिक्षा सोंपून, प्रस्नपत्रिका तपासून निकाल लागता मेरेन बरोच वेळ वतलो आनी शाळा सुरू जावंक कळाव लागतलो. असो गैरसमज हे फावटीय कांय जणांनी करून घेतिल्लो, पूण सगलीं कामां थारिल्ल्या वेळा प्रमाण वेवस्थीत पुराय जालीं. उपरांत यत्ता सवी ते बारावी मेरेनच्यो शाळा एक एप्रील सावन राष्ट्रीय शिक्षण धोरण 2020 प्रमाण सुरू जाल्यो. आमकां शिक्षकांक बरीच धांवपळ करची पडली पूण निमाणें भुरग्यांचो फुडार घडयतले जाल्यार हुकुमाचे ताबेदार जावचे पडटात हाकाच सत मानून वावुरचें पडटा. इतलें मात सामकें खरें. आयज विज्ञान आनी तंत्रज्ञान हांच्या जोड पालवान मनीस खंयच्यान खंय पावत हाचो नेम ना. ताकाच लागून घडये शाळांचे म्हत्व उणें जावंक लागलां असो म्हजो इश्ट राजेशबाब म्हाका सांगत आसता. हातूंत तथ्य ना म्हूण हांव ताका समजावन सांगपाचो यत्न करतां. कारण शाळांचे म्हत्व केन्नाच उणें जावपाचे ना, तरिपूण एक गजाल करूं येत आनी ती म्हणल्यार शाळांनी आपलो दर्जो वाडोवचे खातीर वावर करचो पडटलो. हें स्पर्धात्मक यूग आशिल्ल्यान कठीण सर्तक जावचे खातीर शिक्षकांक तशेंच शिक्षण क्षेत्रांत वावुरतल्या दरेक मनशाक तयार करप खूब गरजेचें थारता. सांगपाचें म्हणल्यार राज्य पांवड्यार तसो प्रयत्न बरे तरेन केल्लो पळोवंक मेळटा.
काळा प्रमाण जावपी बदल आनी नवी शिक्षणीक संकल्पना विद्यार्थी तशेंच शिक्षक हांचे मुखार आशिल्ली हीं आव्हानां म्हणल्यार मनशाचे जिणेचो एक भाग जावन आसा. ताचे बगर जीण मुखार व्हरप खूब कठीण. शिक्षणा बराबर जीण सांवरपाचे धडे लेगीत शाळा कॉलेजींनी दितात. ह्याच कारणांक लागून शाळांचे अशें आपलें खेरीत म्हत्व आसा. शाळा कॉलेजीचें वातावरण आनी हेर कडले वातावरण हांची तुळा आमी करूंक शकनात. ही शिकपी तरणाटी पिळगी आनी तांचे भितर आशिल्लो उपाट उत्साह पळयतकच देशाचो फुडार पर्जळीत जावंक तांचो आदार मेळटलोच ही आस्त आमी बाळगूंक हरकत ना. ह्या शिकपी भुरग्यांचो बारीकसाणेन नियाळ करीत जाल्यार ते नव्या तंत्रज्ञानाची, वेगळ्या विचारांची, कृत्रीम बुध्दीची भासाभास करतना दिसतलें. एक प्रकारची उर्बां तांचे भितर आशिल्लीं तुमकां पळोवंक मेळटली. ह्यो गजाली कितें दाखोवन दितात हेंच मूं आयचे तरणाटे खंयच्याय सांच्यात आपल्याक बसोवन घेवंक शकतात म्हूण. तेच परी नवी निर्मणी करून आपली दिका थारावंक ते सक्षम आसात हातूंत मात लेगीत दुबाव ना. हाकाच लागून आमी तांचो उत्साह वाडोवन तांकां वेळार प्रोत्साहन दीत रावपाक जाय. बऱ्या विचारांचे मनीस घडयतले जाल्यार आयज आमकां हें काम करचें पडटलें. वेळाचे म्हत्व तांकां पटोवन दिवचें पडटलें. आयज नापास जावप कठीण आनी पास जावप सोंपें जाल्ल्या कारणान कांय भुरगीं फुडें फुडें वतात पूण तांचे बुद्दीचो विकास मात जायना, अशी खंत शिक्षक आनी पालक उक्तायतात जी मान्य करून ही परिस्थिती बदलचे खातीर आमकांच तकलास घेवची पडटली. तांची बौध्दीक कुशळटाय विकसीत करपाक तंत्रज्ञान आदारीत उपक्रम करून घेवचे पडटले. ते भायर खंयचेय परिस्थितींत आव्हानां कशीं पेलूं येता हाची म्हायती तांकां सातत्यान दिवची पडटली.
देशांतल्या आनी विदेशांतल्या व्हड मनशांचीं चरित्रां तांकां वाचूंक दिवचीं पडटलीं. खरें म्हणशात तर देश विदेशांतल्या व्हड मनशांनी जैत कशें मेळयलें हाची म्हायती शिकपी भुरग्यां मेरेन पावोवप खूब गरजेचें. अशे तरेच्यो खबरो तांच्यो प्रेरणास्त्रोत जावं येता. ते भायर तांणी केल्ल्या कश्टाचें मोल कशे तरेन तांकां फावो जालें हांच्यो काणयो शिकपी भुरग्यांनी वाचूंक जाय. म्हाका मना सावन सदांच दिसता व्हड बरयणारांचीं पुस्तकां तांकां वाचूंक दिलीं जाल्यार तांची विचार करपाची आनी स्मरण शक्त वाडूंक लागतली. भुरगेपणा सावन तांकां वेगळ्या वेगळ्या विशयांची पुस्तकां वाचपाची आवड लावपाची गरज आसा. अशे केल्यारच तांच्या सामान्य ज्ञानांत भर पडटली. हालींसराक आनीक एक बरी गजाल पळोवंक मेळटा ती म्हणल्यार पालक आपल्या भुरग्यांक वेगळ्यो वगळ्यो कला आत्मसात करचे खातीर खाजगी वर्गाक घालतात. हाचे वेल्यान कुशळटायचें म्हत्व दरेक पालक जाणा जावंक पावला ही बऱ्याची गजाल. एक वेळ आशिल्लो शिक्षकच साबार गूण आशिल्ल्या भुरग्यांक सोदून काडटाले आनी तांच्या पालकांक मेळून त्या त्या कला वर्गांत भुरग्यांक प्रवेश घेवंक प्रोत्साहीत करताले. आतां नवीन शिक्षण प्रणाली प्रमाण तरेकवार कला कुशळटायेचें प्रशिक्षण शाळांनीच सुरू जाल्लें आसा. जाचो लाव ह्या शिकपी भुरग्यांनी घेवन फुडाराची दिका थारावं येता.
कश्ट करतल्याक मरण ना हें सत आमी सदांच भुरग्यांक पटोवन दितात. नवीन शिक्षक जे आसात तांकांय आमी अशेच सकारात्मक विचार दिवचो यत्न सदांच करीत आयल्यात. अनुदानीत शाळेंत शिकोवपी शिक्षक सरकारी शिक्षकां वरींच तांचेर सोंपयिल्लो वावर मुकाट्यानी तडीक व्हरतात काय नात ? तो मागीर कायम स्वरुपी शिक्षक आसूं वा अस्थायी शिक्षक आसूं तेय बी जीव तोडून वावुरतात. म्हणटकच कायम स्वरुपी शिक्षक सरकार कित्याक नेमूक दिनात ? हो प्रस्न हे तरणाटे शिक्षक आमकां करतात तेन्ना आमच्या तोंडाक कुलप लायिल्लें आसता. तांच्या प्रस्नाची जाप आमचे कडेन आसना आनी म्हणून सरकारा लागीं विनवणी करची शी दिसता की ह्या शिक्षणीक वर्सा तरी कायम स्वरुपी शिक्षक ह्या अनुदानीत शाळांनी भरती करूंक दिवचे. ह्या पवित्र शिक्षण क्षेत्राक तांची गरज आसा. तांचो वावर 100 % हातूंत मातूय दुबाव ना. मागीर मानधन इतलें उणें कित्याक ? अनुदानीत शाळांतले कितलेशेच शिक्षक निवृत्त जाल्यात आनी खूबशे निवृत्त जावपाचे वाटेर आसात म्हूण सरकाराक सुचोवणी करूंक सोदतां. ह्या अनुदानीत शाळांनी नव्या शिक्षकांची भरती कायम स्वरुपी करून तांच्या पोटा पाणयाची वेवस्था करची. जेणे करून हे शिक्षक आपलें तशेंच शिकपी भुरग्यांचें हीत सांबाळून प्रामाणीकपणान शिक्षण क्षेत्रांत आपलें योगदान दिवंक पावतले. विरोधाभास करून आमी तांच्या कर्तुबांचेर मर्यादा घालच्यो न्हय इतलेंच म्हजें म्हणणें.

एच मनोज
9822441417