भांगरभूंय | प्रतिनिधी
पणजी : नारी शक्ती वंदना कायदो दुरुस्ती विधेयकाचेर चर्चा करपा खातीर संसदेचें खाशेलें अधिवेशन आपयलां. विधेयक संमत जाले उपरांत लोकसभेंत २७३ सुवाती वाडटल्यो. जाल्यार गोंय विधानसभेंत ५ जागे वाडूंक शकतात. पूण गोंयांत कितले जागे वाडटले हाचेर स्पश्टताय विधेयक संमत जाले उपरांतच कळटलें अशें मुख्यमंत्री डॉ. प्रमोद सावंत हांणी स्पश्ट केलें. बुधवारा पणजे जाल्ल्या नारी शक्ती फोरम कार्यावळींत ते उलयताले. ह्या वेळार डॉ. आयडा मुखर्जी, प्रतिमा धोंड, डॉ.श्रद्धा पाटील, शशी सोनी आनी हेर हाजीर आशिल्ले.
विधानसभा, संसदेंत बायलांक ३३ टक्के आरक्षण दिवपा खातीर २०२३ त नारी शक्ती वंदन अधिनियम मंजूर जाल्लें. देशंात जनगणना २०२७ त सुरू जावन २०२९ मेरेन सोंपपाची शक्यताय आसा. हाचे उपरांत मतदारसंघ फेररचणूक करून बायलां आरक्षणाची अंमलबजावणी करपाक वेळ लागपाक शकता. २०२९ च्या लोकसभा वेंचणुकेंत आरक्षण लागू करपाक मेळचे खातीर कायद्यांत दुरुस्ती करतात. हे खातीर २०११ च्या जनगणनेचो आधार घेतले. विधेयक लोकसभेंत मंजूर जाले उपरांत उण्यांत उणें १८ राज्यांच्या विधानसभांनीय ते मंजूर जावप गरजेचें, अशें मुख्यमंत्र्यान म्हणलें.
सध्या फकत लोकसंख्येच्या आधारार आरक्षण दिल्यार कांय राज्यांक अदीक सुवातो मेळच्यो नाशिल्ल्यो. विशेश म्हळ्यार दक्षिणेंततल्या राज्यांतल्यो सुवात्यो उण्या प्रमाणांत वाडपाच्यो. हे खातीर सध्या आशिल्ल्या ५४३ च्या ३३ टक्के म्हळ्यार २७३ सुवातो वाडपाचो निर्णय घेतला. मात राज्यांच्या विधानसभां विशीं वेगळे निकश लावपाची शक्यताय आसा. महाराष्ट्र , उत्तर प्रदेश सारक्या व्हड वा त्रिपुरा, गोंय सारकिल्ल्या ल्हान राज्यांत कितल्यो सुवातो वाडयतले हे विशींआजूनय निर्णय जावंक ना. विधेयक मंजूर जाले उपरांतूच हे विशीं कितें तें स्पश्ट जातलें, अशें तांणी मुखार म्हणलें.
महिला आरक्षण विधेयकाक लागून कायदो, धोरण निर्मितींत बायलांचो आसपाव वाडटलो. हाका लागून बायालं राज्य, देशाचे नेतृत्व करतलीं. हाका सगल्यांनी फाटबळ दिवप गरजेचें. गोंयांत बायलां आरक्षण रोटेशन पद्धतीन येतलें. हाका लागून प्रसंगार हांव म्हजी सुवातय सोडपाक तयार आशिल्ल्याचें मुख्यमंत्र्यानी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
