भांगरभूंय | प्रतिनिधी
पणजी : कॉंग्रेस पक्षाची संसद आनी विधानसभेंतल्या बायलां आरक्षणाक विरोध ना. सध्या कांय राज्यांनी वेंचणुको जावपाच्यो आशिल्ल्यान भाजप ही प्रकिया गडबडीन करता. २०२७ वर्साची जनगणना पुराय जाले उपरांत ते प्रमाण मतदार संघ फेररचणूक करून मागीरूच बायलां आरक्षण लागू करचें अशी मागणी महिला कॉंग्रेस अध्यक्ष प्रतीक्षा खलप हांणी केली. बुधवारा पणजे जाल्ले पत्रकार परिशदेंत ती उलयताली. ह्या वेळार सई वळवयकार, मॉली दि गामा हाजीर आशिल्लीं.
२०२३ वर्सा संमत जाल्ल्या १०६वे संविधान दुरुस्तींत मतदारसंघ पुनर्गठना उपरांत बायलांचें आरक्षण चालीक लावपाचें स्पश्टपणान सांगलां अशें खालाप हांणी सांगलें. पूण भाजपा फकत दरेक वेंचणुकेंत तांकां कसो फायदो जातलो हाचोच विचार करता. सध्या अस्तंत बंगाल आनी तमिळनाडूंत वेंचणूक सुरू आशिल्ल्यान भाजपान गडबड करीन संसदेचें अधिवेशन आपयलां.हे विशीं कॉंग्रेस फुडारी मल्लिकार्जुन खर्गे हांणी राज्यांच्यो वेंचणुको जाले उपरांत अधिवेशन आपोवपाची मागणी केल्ली. मात ती मंजूर करूंक ना.
तांणी मुखार म्हणलें, सध्या आशिल्ल्या लोकसभेच्या ५४३ जागांनी ३३ टक्के आरक्षण कित्याक दिनात हाची जाप भाजपान दिवची. २०११ च्या आनी आतांचे लोकसंख्येंत खूब फरक आसा. आदले लोकसंख्ये प्रमाण मतदार संघ फेररचणूक केल्यार थंयच्या मतदारांचेर अन्याय जातलो. तशेंच भाजप आपल्याक जाय ते तरेन फेररचणूक करपाची शक्यताय आसा. जे सुवातेर आपले उमेदवार वेंचून येवपाक शकना अशें दिसता, थंय आरक्षण दिवपाक मेळचें ना. हे खातीर २०२७ चे जनगणनेच्या आधाराचेरूच मतदारसंघ फेररचणूक करून मागीर महिला आरक्षण लागू करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
