भांगरभूंय | प्रतिनिधी
पुलिसांचेरुच केलो फारपेट, स जाणांक धरले, दोगजाण पळून गेले
नवी दिल्ली : फाटल्या कांय म्हयन्यां सावन गोंय, कर्नाटक आनी दिल्ली वांगडाच जायत्या राज्यांनी चोरयो, दरोडे घालून पळून गेल्ल्या बांगलादेशी दरोडेखोरांचे टोळयेक दिल्ली पुलिसांनी एके थरारक चकमकी उपरांत धरली. दिल्ली गुन्यांव फाट्यान स अट्टल दरोडेखोरांक अटक केल्या. हे म्हापशें आनी दोना पावला पडिल्ल्या दरोड्यांतलें ‘मोस्ट वॉन्टेड’ गुन्यांवकार आसात. हे कारवायेक लागून आंतरराज्य पांवड्याचेर सक्रिय आशिल्ले एके क्रूर टोळयेचो पर्दाफाश जाला. हे टोळयेंत आनीकूय दरोडेखोर आसात, असो पुलिसांक दुबाव आसा. ट्रान्सफर वॉरंटार ह्या आरोपींक ताब्यांत घेवन गोंयांत हाडटलें.
मध्यरातीचें थरारनाट्य
ही टोळी दरोडो घालपाचे तयारेंत दिल्लींतल्या सराय काले खान मसंडभुंयें लागसारच्या रानांत येवन रावल्या अशी खबर दिल्ली पुलिसांचे गुन्यांव फांट्याक मेळ्ळी. काल मध्यानरातीं पुलिसांनी ह्या वाठाराक वेढो घालो. आमी आडकल्यात हें लक्षांत येतकच ह्या हत्यारबंद दरोडेखोरांनी शरण येवचे बदला पुलिसांचेर थेट फारपेट सुरू केलो. जिवाची परवा करीनासतना पुलिसांनीय तांकां जाप दिवपाक गुळ्यो घाल्यो. उपरांत फाटलाव करून स जाणांक धरले. काळखाचो फायदो घेवन दोगजाण पळून गेले. तांचो सोद चालू आसा.
बांगलादेश ते भारत
अटक केल्ले सगले दुबावीत बांगलादेशांतल्या बागेरहाट जिल्ह्यांतले आसात. टोळयेची कामाची पद्दत नियोजनबद्ध आनी क्रूर. ते बेकायदेशीरपणान शीम हुंपून भारतांत भितर सरताले. खंयच्याय राज्यांत दरोडो मारले उपरांत ते रोखडेच थंयच्यान पळून वताले आनी थेट बांगलादेशांत वचून लिपून बसताले. कांय म्हयने थंय रावन ते परतून भारतांत नवे शिकारेक लक्ष्य करपाक येताले. खास करून एकांतांत रावपी गिरेस्त जाण्टे लोक तांच्या निशाण्यार आशिल्ले. प्रतिकार केलो जाल्यार ही टोळी निर्दयीपणान तांची हत्या करपाक लेगीत फाटीं-फुडें पळयनासली.
गोंयांतले दरोडे
20 एप्रील 2025 क दोना पावलाच्या एका बंगल्यांत घुसून हे टोळीन घरमालकांक बाथरुमांत बंद करून एक किल भांगर आनी ३ लाख रुपया लुटिल्ले. 7 ऑक्टोबर 2025 म्हापशेंच्या हावसिंग बोर्ड वाठारांत अशेच पद्धतीन 35 लाखांची लूट केल्ली. मागीर कागाळदाराची गाडी घेवन ते पळून गेल्ले.
गोंय गुन्यांव फांट्याचे अधीक्षक राहुल गुप्ता हांच्या मार्गदर्शना खाल ह्या प्रकरणाचो तपास चालू आशिल्लो. सायबर सेल आनी तांत्रिक विश्लेषणाच्या आदारान गोंय पुलिसांनी देशभरांतल्या पुलिसांक म्हत्वाचे धागेदोरे धाडिल्ले. ते हे टोळयेक धरपाक निर्णायक थारले.
जप्त केल्लीं हत्यारां
पुलिसांनी दुबावितां कडल्यान चार पिस्तूल, जिवीं काडतुसां, घरफोडी करपाचीं साधनां आनी धारदार सुरो जप्त केला. अटक केल्ल्या दुबावितां मदीं सुमन हलधर, सैफुल इस्लाम, सोहेल शेख, मुहंमद नासीर, नूर इस्लाम आनी झाकीर हांचो आस्पाव आसा.
हातूंतल्या मुहमंद नासीराचेर आदींच कर्नाटक आनी उत्तर प्रदेशांत खुनाचे गुन्यांव नोंद आसात. गोंयच्या दोन प्रकरणां वांगडाच कर्नाटक, दिल्ली, केरळ आनी ओडिशा मदल्या वट्ट चौदा व्हड गुन्यावांची कबुली हे टोळयेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
