भांगरभूंय | प्रतिनिधी
पणजी : पणजेच्या कदंब वाठारांत आयतारा रातीं कडेन अनवळख्यांनी एका तीन माळयेच्या बंगल्यांत चोरी करून सुमार ८ ते १० लाख रुपयांच्यो भांगरा वस्ती फारायल्यो. भर वस्तींत जाल्ले हे चोरयेक लागून हांगच्या नागरिकां मदीं भंयाचें वातवरण पातळ्ळां. ह्या प्रकरणांत बंगल्याचे धनी राजीव अग्रवाल हांणी पोरणें गोंय पुलीस स्टेशनांत कागाळ दाखल केल्या.
हे विशीं मेळिल्ले म्हायती प्रमाण, आयतारा मध्यानरातीं चोरांनी अग्रवाल हांच्या तीन माळयेच्या बंगल्याक लक्ष्य केलें. चोरांनी बंगल्याचे पयले माळयेवेले एके कुडींत प्रवेश करून भांगराच्यो वस्ती फारायल्यो. सकाळीं सुमार पांच वरांचेर घरांतल्यांक जाग आयले उपरांत घरानची एक मनीस ते कुडींत गेली तेन्ना थंयचें पातळिल्लें सामान पळोवन तिका धक्को बसलो. घरांत चोरी जाल्ल्याचें समजतांच घर धनयान रोखडोच पुलिशेंत संपर्क केलो.
उपरांत पोरणें गोंय पुलिसांनी आयतारा सकाळीं घडणुके सुवातेर येवन पंचनामो केलो. वाठारांतल्या सीसीटीव्ही कॅमेर्यांची तपासणी केली तेन्ना रातचे तीग जाण बंगल्यांत प्रवेश करतना स्पश्ट दिसले. तांचीं मुखामळा कपड्यान धापिल्लीं. चोरयेक गेल्ली मालमत्ता आनी हेर सामानी वळेरी आजूनय घर धनयान पुरायेन स्पश्ट करूंक ना. सध्या पुलीस निरीक्षक गौरीष मळीक हांच्या मार्गदर्शना खाला उपनिरीक्षक साईश भोसले ह्या प्रकरणाचो खोलायेन तपास करतात. दुबाविताचो सोद घेवपा खातीर विवीध पंगड तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
