भांगरभूंय | प्रतिनिधी
पणजी :मुंबय उच्च न्यायालयाचे आदले न्यायाधीश संदीप शिंदे हांणी बुधवारा लोकायुक्तपदाचो ताबो घेतलो. महामहीम राज्यपाल पुसापती अशोक गजपती राजू हांचे कडल्यान ४ मार्चाक अधिकार आनी गोपनीयतेचो सोपूत घेतल्या उपरांत नव्या लोकायुक्तांनी कामकाजाक सुरवात केल्या. आदले न्यायाधीश संदीप शिंदे हे गोंयचे चौथे लोकायुक्त आसात.
पयले दिसा लोकायुक्त कार्यालयांतले अधिकारी आनी कर्मचारी हांचे कडेन परिचय करून घेवपा सयत याचिका तशेंच कागाळींच्या फायलींची तांणी पळोवणी केली, अशी म्हायती कार्यालयांतल्या अधिकार्यांनी दिली. पयले दिसा सुनावणी मात तांणी घेवंक ना.
अंबादास जोशी हांचो कार्यकाळ सोपले उपरांत १४ म्हयन्या उपरांत लोकायुक्तांची सोपुतविधी जाली.
बी. सुदर्शन रेड्डी, पी. के. मिश्रा आनी अंबादास जोशी हांचे उपरांत संदीप शिंदे हांणी लोकायुक्त म्हूण सोपूत घेतलो. २० डिसेंबर २०२४ दिसा अंबादास जोशी हांचो कार्यकाळ सोंपलो. हाचे उपरांत हें पद खाली आशिल्ले. जानेवारींत संदीप शिंदे हांचें नांव सरकारान लोकायुक्त पदाखातीर निश्चीत केल्ले. हाचे उपरान ४ मार्चाक सोपुतविधी जाली आनी आतां १५ एप्रिलाक तांणी कामकाजाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
