भांगरभूंय | प्रतिनिधी
मडगांव : सरकारी कर्मचारी आपलें कर्तव्य करतना मडगांव नगरपालिकेच्या कर्मचार्याक सोनसडो हांगां रस्त्यार आडावन, ताच्या वाहनाचेर हल्लो केलो. ह्या प्रकरणांत फातोड्ड्यां पुलिसांनी अनवळखी ओमनी कार चालका आड गुन्यांव नोंद केला.
हे विशीं मेळिल्ले म्हायती प्रमाण, मडगांव पालिकेचे कर्मचारी फ्लोरीनो सोरेस (रा. चंद्रवाडा, फातोड्ड्यां) हांणी हे विशीं पुलिशेंत कागाळ दिल्या. कागाळी प्रमाण, १३ एप्रिलाक रातच्या सुमार साडे धा वरांचेर फ्लोरीनो पालिकेचें वाहन घेवन फातोड्डेंच्यान रायचे दिकेन वताले. सोनसड्या कडले मसंडभूंये कडेन पावतांच, तेच दिकेन वचपी ओमनी गाडयेन तांच्या वाहनाक धपको दिलो.
उपरांत, ओमनी कार चालकान गाडी आडवी घालून फ्लोरीनो हांचें वाहन आडयलें. दुबावितान गाडयेंतल्यान देंवून एका लोखणाचे वस्तून फ्लोरीनो हांच्या वाहनाचेर हल्लो करून वाहनाचें लुकसाण केलें. सरकारी कामांत आडमेळीं हाडून धमकायिल्ल्या प्रकरणांत अनवळख्या आड फातोड्ड्यां पुलिसांनी गुन्यांव नोंद केलो. पुलीस उपनिरीक्षक सत्वशील देविदास हे विशीं फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
