भांगरभूंय | प्रतिनिधी
एके बायले आड गुन्यांव नोंद
पणजी : सांग्यार एके सोसायटींत दूूद संकलन आनी जनावरांच्या खाणां विक्रेच्या वेव्हारांत अर्थीक अनियमितताय आनी विस्वासघात केल्ल्या प्रकरणांत सांगें पुलिसांनी एके बायले आड एफआयआर नोंद केल्या. दुबावीत विंदा वेळीप हांणी आपल्या कर्तव्यांत फटींगपणां करून सुमार १,६२,९१२ रुपयांचो घोटाळो केल्ल्याचो आरोप आसा, अशें कागाळेंत नोंद केलां. हे कागाळी उपरांत ह्या वाठारांत बोवाळ पातळ्ळा.
हे विशीं देवानंद वेळीप हांणी पुलिशेंत कागाळ नोंद केल्या. कागाळी प्रमाण, २०२२-२३ ह्या अर्थीक वर्सांत दुबावीत विंदा वेळीप हांचे कडेन दूद संकलन, जनावरांच्या खाणाची विक्री आनी तांचे कडेन संबंदीत अर्थीक नोंद दवरपाची जापसालदारकी दिल्ली. मात दुबावितान हे नोंदींत व्हड घोटाळो केल्ल्याचें ऑडीट वेळार समजलें. जनावरांच्या खाणाचो सांठो आनी तांचो हिशेबांत फटींगपणां जाल्ल्याचें दिसून आयलें. दुबावीत ह्या पदाचो गैर वापर करून स्वताच्या फायद्या खातीर निधीचो गैर वापर केल्ल्याचो दावो केला.
तपासणे मजगतीं, कामधेनु ग्रोवेट आनी गोवा बागायतदार अश्या पुरवण दारां कडल्यान जनावरांच्या खाणाचो सांठो मागोवपा खातीर दुबावितान मागणीपत्रां सादर केल्लीं. ह्या मागणीपत्रांच्या आदारार सोसायटी कडल्या संबंदीत पुरवणदारांक पयशेय दिले. मात ताचे बदला मेळपी सांठो एकतर पुरायेन मेळूंक ना वा मेळिल्ल्या सांठ्याची कसलीच अधिकृत नोंद वा डिलिव्हरी चलान दुबावितान सादर करूंक ना. हाका लागून सोसायटीचे १.६२ लाख रुपयांचें लुकसाण जालें, हो फौजदारी स्वरूपाचो गुन्यांव आशिल्ल्याचें पुलिसांनी म्हणलां. सांगें पुलीस स्टेशनाचे उपनिरीक्षक प्रद्युम्न केणी ह्या प्रकरणाचो सविस्तर तपास करतात, अर्थीक वेव्हाराच्या सगल्या कागदपत्रांचें सध्या व्हॅरिफिकेशन करप चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
