भांगरभूंय | प्रतिनिधी
जेन्ना एक मनीस सगल्या गजालींचेर नियंत्रण दवरपाचो यत्न सोडून दिता, तेन्ना हेर लोक स्वताचेर नियंत्रण दवरपाची जबाबदारी स्विकारतात.
एक दीस सांजवेळार घोवान सहज दारांतल्यान घरकान्नीक म्हणलें, “आगो आयकता , हांव इश्टां वांगडा भायर सरतां.” बायल कपड्यांक घडी घालताली. तिणें घोवाक पळयलें आनी शांतपणान म्हणलें, “बरें आसा… चल हां… चल मजा कर.” हरशीं ती सदांच इश्टां वांगडा भायर सरतां म्हणल्यार बेगीन यो, गाडी सवकास सांबाळून चलय, रागान सुस्कारो सोडत शिटकावणी दिताली. पूण ना कसली किरकीर, ना सुस्कारो सोडून राग, प्रस्न ना. फक्त शांत स्वरांत “बरें आसा… चल मजा कर.” हें आयकून घोव अजापीत जालो.
कांय वरां उपरांत पूत, निरशेलें तोंड करून हातांत एक पेपर घेवन रांदचेकुडींत आयलो. “मम्मा,” ताणें दबक्या आवाजांत म्हणलें, “म्हज्या मॉक परिक्षेचे रिजल्ट आयल्यात… आनी मार्क कमी मेळ्ळ्यात.” पुतान आवयक पेपर दाखयत सांगलें कारण तिका आपल्या अभ्यासाचो कितलो हुस्को आसा तें ताका खबर आशिल्लें. तिगेलो नित्याचो उपदेस- “अभ्यास सोडून फुकट वेळ घालयल्यार रिजल्ट वायट येतलोच” हें सगलें आयकुपाक तो तयार आशिल्लो. पूण आवयन फक्त मान हालयत आयकत म्हणलें, “बरें आसा.” तें आयकून पुताक अजाप दिसलें. ताणें विचारलें, “आयज फक्त
बरें आसा?” तिणें ल्हवूच म्हणलें, “हय. तुवें चड कश्ट घेवन अभ्यासाचेर लक्ष केंद्रीत केल्यार फुडले फावटी तुका बरे गूण मेळटले. ना जाल्यार वर्स परतून रिपीट करचें पडूं येता. निर्णय तुजो.
हांव तुका दोनूय परिस्थितींत मजत करतलें.” ही जाप आयकून गोंदळून थंयसून भायर सरलो.
दुसऱ्या दिसा दनपारां धूव घरा आयली. तेन्ना तिचे मुखामळार ताण स्पश्ट दिसतालो. “मम्मा,” तिणें भियेत “हांवें गाडयेक धपको दिलो… गंभीर अशें कांयच घडलें ना, पूण गाडयेक मात चेंप पडलां.” म्हणपाचें सांगलें. तें आयकून आवय भुवयो वयर काडून चलयेचेर रागान आड्डली ना. तिणें शांतपणान म्हणलें, “बरें आसा. फाल्यां गॅरेजींत गाडी व्हर आनी दुरुस्त कर.” तें आयकून धूव स्थब्ध जाली. “मम्मा तुका आयकून राग आयलो ना?” धुवेन विचारलें. आवयन हलकें हांसून म्हणलें, “रागार जाल्यार गाडयेक पडिल्लें चेंप समा जातलें व्हय? फुडले खेपे चड जतनाय घेवन गाडी चलोवची.”
जी आवय दर एका गजालींचो रोखडो ताण घेवन रागार जाताली, तिगेल्या सभावांत बदल कसो आयलो? हो प्रस्न घरांतल्या सगल्यांक पडलो. आतां ती इतली शांत, स्थीर कशी जाली? निमाणें त्या दिसा सांजे सगल्यांनी तिका हॉलांत बसयली. घोवान विचारलें , “तूं ह्या दिसांनी सामकें वेगळें वागता. कितेंय जालें तरी पयलीं भशेंन तूं रागार जायना. सगलें बरें मू?” तिणें मोगान तांचे कडेन पळयत म्हणलें, “सगलें बरें आसा. म्हाका एक म्हत्वाची गजाल कळ्ळी.”
तिणें फुडें सांगलें, “हावें ताण घेवन तुजें जिवीत सोंपें जावचें ना, हांव तुका सल्लो, मार्गदर्शन करपाक शकतां, मोग, आदार दिवंक शकतां . पूण तुजें जिवीत हांव म्हज्या मता प्रमाण जगूंक दिवपाक शकना. तुवें घेतिल्ल्या निर्णयांच्या परिणामांक तुकाच तोंड दिवचें पडटलें. मागीर तें बरें वा वायट आसूं, “बरीच वर्सां हांव सगल्यांचो हुस्को करतालें. तुका घरा येवपाक कळाव जाल्यार म्हजो हुस्को वाडटालो, भुरग्यांची शिक्षडीक ग्रेड उणी जाल्यार स्वताक दोश दितालें, कितेंय मोडलें जाल्यार राग येतालो, कोणाक वायट दिसलें जाल्यार तें सुदारपाचो यत्न करतालें, पूण आतां म्हाका समजलां- हांव करता तें हुसक्यान वा ताणातल्यान घडटा कोणाचेच प्रस्न सुटावे जायनात तातूंतल्यान हांव म्हजी मनशांती भंग करूंन घेतां .”
पुतान विचारलें, “म्हळ्यार हाचे फुडें आमी केल्ल्या वायट- बऱ्या कर्तृबांचेर तुजी प्रतिक्रिया नासतली ?” आवयन पुताक म्होंवाळ उतरानी जाप दिली, “आरे शाण्या उरफाटें. म्हजो तुमचे विशीं चड हुस्को वाडटलो. पूण हुस्को करप आनी तुमचेर नियंत्रण दवरप ह्यो दोन वेगळ्या गजालींत फरक आसा, हांव तुमचेर मोग करतना, तुमचो ताण म्हजे तकलेर घेवचें ना. तुमचेर मोग करप, मार्गदर्शन करप आनी गरज पडटा तेन्ना धीर दिवपाक तुजे फाटल्यान उबें रावप हें म्हजें कर्तव्य. पूण तुमी कामा वांगडा स्वताचें जिवीत जगत निर्णय घेवन परिणाम स्विकारपाक शिकपाक जाय.”
ते रातीं सगलींच तिच्या दर एका उतरांचो विचार करपाक लागलीं . पूत आवयक भियेवन न्हय तर जापसालदारकेच्या भावनेन अभ्यास करपाक लागलो. धुवेन दुसऱ्या दिसा स्वता गॅरेजींत वचून गाडी दुरुस्त करून घेतली आनी विमो कसो कव्हर करतात ताची चवकशी केली . जेन्ना घोव इश्टां वांगडा भायर सरतालो तेन्ना बायलेक मुजरत फोन करतालो, तिका खोशी करपाक न्हय तर बायलेक मान दिवपाक. ल्हवू ल्हवू घरांतल्या वातावराणांत बदल घडपाक लागलो. आतां घरांत कोणूय आवयचे दडपणा खाला वावर करिनाशिल्ले. चुको घडटात त्यो मान्य करून सुदारपाक लागले. कारण कुटुंबांतल्या एका मनशान शांती वेंचली आनी ती शांती घरभर पातळ्ळी. जेन्ना एक मनीस सगल्या गजालींचेर नियंत्रण दवरपाचो यत्न सोडून दिता, तेन्ना हेर लोक स्वताचेर नियंत्रण दवरपाची जबाबदारी स्विकारतात. अशें तरेन मानसीक शांती संसर्गावरी पातळटा.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
