भांगरभूंय | प्रतिनिधी
चूक कोणाचीय आसूं, वेंचणूक जावं वा ना जावं पूण लुकसाण मात आमकां आम जनतेक सोसचें पडटलें. जो खर्च जाला तो आमच्याच बोल्सांतल्यान वचपाचो.
संकल्प आनी सिद्धी हाचे मदीं नियती आसता अशें म्हणटात. नियतीच्या मनांत येना तो मेरेन सिद्धी प्राप्त जायना. कितलेय संकल्प करात, कसलें ना कसलें आडमेळें येतलेंच. नियतीन थारावंक जाय तेन्नाच सगलें जाग्यार पडटलें. आतां फोंडेंचेंच उदाहरण घेयात. सामकें हाता-तोंडा कडेन म्हणटात तशें पाविल्लें. फक्त एक रात वचूंक जाय आसली आनी अकस्मात कोर्टाचो निकाल आयलो. कोर्टान फक्त नेमाचेर बोट दवरलें. हो नेम अशें अशें सांगता. जालें, वेंचणूक रद्द. जे जे बाशींग बांदून सव्यार चडिल्ले सगले धड्यार पडले. पळयात हाकाच नियती म्हणटात.
हाचे पयलीं असो एक निकाल मुंबय हायकोर्टाच्या नागपूर खंडपिठानूय दिल्लो. आमदाराक काम करूंक एका वर्सा परस उणो काळ मेळटा आसत जाल्यार वेंचणूक घेवपाची गरज ना म्हणपाचें तेन्नाच सगल्यांक खबर जाल्लें. अशें आसुनूय वेंचणूक आयोगान वेंचणूक जाहीर केली. वेंचणूक आयोगाक वेलो निकाल खबर नासलो काय थंय बशिल्ले लोक गणितांत कच्चे आनी तांकां वर्साचो काळ मेजूंक आयलो ना, कळप कठीण. खरें म्हणल्यार फोंडेंचो सीट रितो जालो तेन्नाच सरकारान आयोगाचे फाटीक लागून वेंचणूक जाहीर करूंक जाय आसली. पूण सरकारूय ओगीच रावलें. जर तेन्नाच वेंचणूक घेतिल्ली जाल्यार ताचो लाव सरकारी पक्षाकूच जावपाचो. गेल्ल्या मनशाचे सहानभुतीचो फायदो, ताका श्रद्धांजली, ताका मुक्ती मेळचे खातीर ताच्या नांवांन मतां सगलीं नाटकां करूंक मेळपाचीं. पूण वेळ वता तसो लोकांक विसर पडटा आनी मागीर सगलें बळगें एकठावचें पडटा. जशें फोंडेंचे वेंचणुकेंत संपूर्ण मंत्रीमंडळाक प्रचाराक देंवोवचें पडलें आनी हें उणें म्हणून महाराष्ट्राच्या मुख्यमंत्र्याकूय गोंयांत येवचो पडलो.
आतां लोकांच्या मनांत कितें आसलें तें मतदाना उपरांतूच कळपाचें आसलें. लोकांक कोण जाय आनी कोण नाका, लोक कोणाच्या गळ्यांत हार घालतले आनी कोणाक हारयतले तें कळपाक एकूच रात वचचेली आसली. लोकांच्या मनांत कितेंय आसूं नियतीच्या मनांत वेगळेंच आसलें आनी तेंच घडलें. आतां मुखार ह्या निकाला आड कोण सर्वोच्च न्यायालयांत वता काय सगलेच हात पांगरून वोग्गी बसतात तें कळटलेंच म्हणात. जर आमदाराक काम करूंक वर्साचोय काळ मेळना जाल्यार इतलो खर्च कित्याक करपाचो? देखून हो नेम. आमदाराक पांच वर्सांचो काळ मेळ्ळो वो पांच म्हयन्यांचो, वेंचणूक घेवपाक खर्च तितलोच येवपाचो. सरकारी तिजोरेर हें वजें पडचें न्हय होच ह्या नेमा फाटलो हेतूू.
खरें म्हणल्यार सरकारान वा वेंचणूक आयोगान हातूंत हस्तक्षेप करून न्यायालयाक पटोवन दिवंक जाय आसलें कीं हो सगलो खर्च पयलींच जाला. वेंचणूक जाहीर जाली आनी सगले कामाक लागले. खूबश्या सरकारी कर्मचाऱ्यांक वेंचणूक ड्युटीचेर घाले. तांकां प्रशिक्षण दिलें. सगलें सामान घेतलें. आनी जे दिसा न्यायालयान निकाल दिलाे तेन्ना म्हणल्यार सगले कर्मचारी बुथांचेर सामान घेवन पाविल्ले. आतां बुथां मुखार माटोव घाले तांकां बिलां फारीक करचींच पडलीं. जे कामार रुजू जाले तांचो खर्च दिवचोच पडलो. तांकां हाडपा व्हरपा खातीर गाडयो वापरल्यो ताचो खर्च. प्रशिक्षणाचो खर्च पयलींच दिलो. मागीर वेंचणून रद्द करून कसलो फायदो जालो? जो खर्च जावचो न्हय म्हणून वेंचणूक घेवची गरज ना म्हणटात तो खर्च जालोच आनी वेल्यान वेंचणूक रद्द जाली. हातूंत फायदो कसलो? पूण हें न्यायालयाक पटोवन दिवंक आयोग उणो पडलो म्हणचो पडटलो.
ज्या तीन पक्षांनी आपले उमेदवार उबे केल्ले त्या पक्षांनीय चुकयलें म्हणचें पडटलें. तांणीय कोणे हे केसींत हस्तक्षेप केलो ना. करूंक जाय आसलो. आपली बाजू कोर्टा मुखार दवरूंक जाय आसली. तुमकां ही वेंचणूक मान्य आसली म्हणून तर तुमी उमेदवार उबे केल्ले. मागीर कोर्ट आपलेच वटेन निकाल दितलें ह्या भरवंश्यार कशे रावले तुमी? तुमी कोर्टाक पटोवन दिवंक जाय आसलें, जें कितें घडलां तातूंत तुमची कांयच चूक ना. चूक आयोगान केल्या जाल्यार ताची ख्यास्त उमेदवाराक कित्याक? तुमी सांगूक जाय आसलें, ‘आमी जायते दुडू मोडल्यात. पोस्टरां छापलीं, कार्यकर्ते पुंजायले, तांचो खर्च केलो. पेत्रोल, जेवण-खाण, कोण सगलें दिलें. लोकांच्या दारांत भोवंक घाम वारयलो. आनी इतलें सगलें केले उपरांत आमकां मेळटलें कितें? कोण भरून दितलो आमचें लुकसाण? चूक वेंचणूक आयोगान केल्या जाल्यार आयोगाक दंड घालात. परतून अशी चूक जावपाक जायना म्हणपाची शिटकावणी दियात पूण सद्याक ही वेंचणूक चालीक लावन आमकां न्याय दियात.’ अशें कित्याक केलें ना एकाय पक्षान. काय तुमकांय ही वेंचणूक जाल्ली नाका आसली आनी सगलें सरकारान केलें म्हणून सरकाराच्या माथ्यार मारून साव जावचे आसले? कित्याक जाले नात तुमी पक्षकार हातूंत? वेंचणूक जाल्ली जाल्यार कोण खंय आसा तें तरी कळपाचें. गोंयभर जीं आंदोलनां जातात ताचो परिणाम कितेंय जाता जाल्यार कळपाचें. लोकांक गोंय राखपाचें आसा काय फक्त एका दिसाव मेळपी दुडवांक भुल्लुसपाचें आसा तें तरी कळपाचें. पूण वेंचणुकूच जाली ना म्हणटकूच कशें कळटलें हें सगलें?
चूक कोणाचीय आसूं, वेंचणूक जावं वा ना जावं पूण लुकसाण मात आमकां आम जनतेक सोसचें पडटलें. जो खर्च जाला तो आमच्याच बोल्सांतल्यान वचपाचो. एक दोन दीस जायते जाणांक सरकारी सुचोवणेक लागून आपणालो धंदो बंद दवरचो पडलो. तांकांय लुकसाण जालेंच. कांय कर्मचारी वेंचणूक ड्युटीर गेल्ल्यान लोकांक फावटीय पडल्यो. कांय दीस सगलें सरकार फोंड्यां येवन रावलें तो खर्चूय आमच्याच बोल्सांतल्यान वचपाचो. एकूण कितें चूक कोणाचीय आसूं त्रास आमकांच. न्यायालयान हाचेरूय विचार करपाची गरज आसा काय दिसता. तुमकां कितें दिसता?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
