भांगरभूंय | प्रतिनिधी
सौर्य आनी संकर वंयांक उणो प्रतिसाद
पणजीः गोंय राज्यांत शेतकारांक पिकांची राखण करपी वंय मारपाच्या अनुदाना खातीर चेनलींक वंयेक सगल्यांत चड मागणी आसा. फाटल्या पांच वर्सांच्या काळात निधी वांटप आनी लावार्थ्यांची संख्या ह्या दोनूय गजाली विशीं हे वंयेचो वांटो सगल्यांत चड आसा. दरेक वर्सा अनुदानाच्या वट्ट वांटपांतलो सुमार अर्दो वा ताचे परस चड वांटो फक्त ह्याच वंयेचो आसा, अशी म्हायती शेतकी संचालनालयान दिल्या.
शेतकी संचालनालयान दिल्ले म्हायती प्रमाण चेनलींक वंय मारपा खातीर अनुदानाचो लाव घेवपा फाटलीं मुखेल कारणां म्हळ्यार ही वंय सवाय आसा. तशेंच ती चड काळ तिगता आनी गांवगिऱ्या वाठारांनी ताचो वापर व्हड प्रमाणांत जाता. जाल्यार मागणेंत काट्यांच्या सरयांची वंय ही दुसरे वळेरेर आसा. जाल्यार फातरांच्या वणटीक मध्यम मागणी आसा. सौर्य उर्जेर चलपी वंय आनी संकर वंय हांचो वापर सामकोच उणो आसा.
वर्स 2021-22 ह्या वर्सा येवजणेंत सगल्यांत बरी कामगिरी केल्या. वट्ट 343 शेतकारांक 3.05 कोटी इतले अनुदान फावो जाला. हातूंत चेनलींक वंये खातीर 149 लावार्थ्यांक रु. 1.54 कोटी आनी काट्याचे सरयेचे वंये खातीर 115 लावार्थ्यांक रु. 61.67 लाख इतले अनुदान दिलां.
वर्स 2022-23त प्रतिसाद मात्सो उणो जावन 330 लावार्थ्यांनी रु. 2.81 कोटी इतले अनुदान घेतलां. पूण
चेनलींक वंयेची मागणी वाडून 160 लावार्थ्यांनी रु. 1.64 कोटी इतलें अनुदान घेतलें. वर्स 2023-24त अनुदानांत मात्शी वाड जावन निधी रु. 2.87 कोटी मेरेन पावलो. पूण लावार्थ्यांची संख्या उणी जावन 306चेर पावली. चेनलींक वंयेचो सगल्यांत चड 170 लावार्थ्यांनी लाव घेवन तांकां रु. 1.84 कोटी निधी फावो जालो. पूण ह्या दोन वर्सांच्या काळांत सौर्य आनी संकर वंयेचे मागणेंत मात आनिकूय उणाव जालो.
वर्स 2024-25त 175 लावर्थ्यांनी रु. 1.67 कोटी इतलें अनुदान घेतलें. हातूंत चेनलींक वंयेची मागणी थीर रावन रु. 1.15 कोटी निधीचें वांटप जालें. ह्या वर्सा सौर्य आनी संकर वंयेक मातूय प्रतिसाद मेळूंक ना. जाल्यार 2025-26 वर्स तें आतां मेरेन 186 लावार्थ्यांनी रु. 1.59 कोटी इतलो लाव मेळयलो. ह्या वर्साय चेनलींक वंय पयले सुवातेर आसून 84 लावर्थ्यांनी रु. 85.59 लाख इतलें अनुदान घेतलां. जाल्यार सौर्य वंयेचो वापर परतून सुरू जावन रु. 19.42 लाख निधीचें 20 लावार्थ्यांक वांटप केलां. पूण संकर वंयेक अजूनय प्रतिसाद मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
