भांगरभूंय | प्रतिनिधी
पणजी: गोंय बायलां फोरमान प्रस्तावीत डिपॉझिट रिफंड स्कीमी (डीआरएस) विशीं हुस्को उक्तायला. ही येवजण गिरायक कायद्याचें उल्लंघन थारपाक शकता, गिरायकांच्या खर्चांत वाड करपाक शकता आनी थळावे वेपारी तशेंच पर्यटनाचेर वायट परिणाम लेगीत जावपाक शकता, अशी शिटकावणी फोरमाची निमंत्रक लॉर्ना फर्नांडीस हांणी दिली.
प्लास्टीक वा कंवचेची बाटली तशेंच कॅन विकतीं घेतना पयलीं डिपोजीट भरचें. उपरांत हें भरिल्लें डिपोजीट तुमच्या घरा, पसर्यार वा लागींच्या व्हेंडीग माक्नांत तें जमा केल्यार युपीआय वरवी पयशे परत येतात अशी बातमी ‘भांगरभूंय’न उजवाडाक हाडिल्ली.
हे बातमेक प्रतिक्रीया दितना फर्नांडीस हांणी सांगलें, पॅक केल्ल्या वस्तूंच्या छापील मोला (एमआरपी) परस चड डिपॉझिट आकारप हें वजन माप कायद्या खाला येवपी पॅकेज्ड कमोडिटी नेमाचे विरोधात आसा. हाका लागून गिरायक आनी दुकानदार हांचे मदी किजीलां पेटपाची शक्यता उप्ररासता. तशेच गिरायकान हे विशीं कागाळ केल्यार पसरकारांक दरेक पॅकेजा फाटल्यान रु. २ हजार रुपया इतलो दंड पडपाक शकता.
गोंयच्या शेजारी राज्या महाराष्ट्र आनी कर्नाटकाचे तुळेंत हांगासल्ले वस्तूंच्यो दर वाडटल्यो, देखून गिरायक ऑनलाईन वा राज्या भायर वचून खरेदी करतले. हाचो परिणाम थळाव्या दुकानांचेर जातलो, असो युक्तिवाद फर्नानडीस हिणे केलो.
संवसारभर रिसायकलिंग वेवस्था ही रिव्हर्स वेंडिंग मशिनां वरवीं चलता. जातूंत गिरायकांनी आपले पॅकेजिंग परत केल्यात ते खातीर तांका पयशे मेळटा. पूण डिआरएस हाचो अर्थ गिरायकांचेच पयशे गिरायकांक परत दितात. तशेंच, रिफंड मेळोवपा खातीर मोबाईल नंबर, युपीआय वा आधार विशीं म्हायती दिवप म्हळ्यार प्रायव्हेसी हक्कांचे उल्लंघन करप, अशी भिरांत फर्नानडीस हांणी उक्तायला.
ही येवजण पर्यटकांचेर गोंयचे विशेश कर कशें काम करतली आनी राज्याची प्रतिमा इबाडून उडयतली. सरकारान हे येवजणेचेर परतून विचार करून गिरायकांक सोयीचे अशे पर्याय सोदून दिवचे, असो उलो फर्नांडीस हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
