भांगरभूंय | प्रतिनिधी
शिरगांव जात्रा : दुकानांचो जागो, आकाराचो आराखडो निश्चीत
पणजी : शिरगांवच्या लयराई देवीच्या वर्सुकी जात्रेक आतां फकत ६ दीस उरिल्ल्यान तयारी झुझा पावंड्यार सुरू आसा. सुरक्षा उपाय आनी गर्दीचें वेवस्थापन योग्य तरेन जावचें म्हूण उत्तर गोंयचे जिल्लोधिकारी अंकीत यादव हे दर दिसा कामांचो नियाळ घेत आसा. जात्रे पयले दिसा २१ एप्रिलाक गर्दी चड आसता. दुकानांचो आकडो मर्यादीत दवरपा सयत तांचो आकार लेगीत निश्चीत जाला. एखाद्या दुकानाक चड सुवात व्यापली जाल्यार ताचेर बेगोबेग कारवाय जातली, अशी शिटकावणी खासा समितीन दिल्या. दुकानाचींं थळां तशेच तांचो आकार निश्चीत करपी आराखडो आपत्ती वेवस्थापन समितीन तयार केला.
दुकानांक लागून गर्दी वाडटा. खरेदी करपा खातीर लोक दुकानां भोंवतणी जमता. हाका लागून लोकांचे येवप वचप सुरळीत जायना.
रस्त्याच्या कुशीक जीं १५ दुकानां आसतली दर वर्सा परस देड मीटर फाटीं आसतली. तशेंच होमकुंडा मुखारच्या मैदानाचेर मान्यताय दिल्ल्या दुकानांची रूंदी ५ मिटर आसतली. एखाद्या दुकानान ५ मीटरा परस चड जागो घेतलो जाल्यार ताचेर कारवाय जातली. दुकानांची सुवात आनी तांका दिल्लो जागो हाचो आराखडो पंचायत तशेंच देवस्थान समितीक धाडला. पयले दिसा फकत ३४ दुकानां आसतली. दुसरे दिसा (२२ एप्रील सावन) सकाळीं १० वरा उपरान दुकानांचो आंकडो वाडटलो. मात तांचो आंकडो कितलो आसचो ते विशीं चर्चा सुरू आसा, अशी म्हायती उत्तर गोंय जिल्होधिकारी अंकीत यादव हांणी दिली.
पयले दिसा उत्तर गोंय जिल्लोधिकारी, उपजिल्होधिकारी, पुलीस अधीक्षक ही घडणूक थळाचेर हाजीर आसतले. ऍम्बुलन्स, दोतोर तशेंच उजो पालोपी दळाच्या जवानांची लेगीत हाजेरी आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
