भांगरभूंय | प्रतिनिधी
पणजी : फाटल्या वर्सा राज्यांत एक भिरांकूळ उज्याची घडणूक घडिल्ली. हाचो आमकां पश्चाताप जाता. फुडाराक अशी घडणूक घडची न्हय हे खातीर पर्यटन आनी उद्देग क्षेत्रांनी जतनाय घेवची. दोनूय क्षेत्रांनी उज्याचे सुरक्षेविशीं सगले नेम खरपणान पाळचे असो उलो डॉ. प्रमोद सावंत हांणी मारलो. मंगळारा राष्ट्रीय उजो पालोवपी दळाच्या दिसा निमतान आयोजीत केल्ले कार्यावळींत ते उलयताले. ह्या वेळार दळाचे संचालक नितीन रायकार, मुखेल सचीव व्ही कांदावेलू, डॉ. उदयसिंह राव राणे आनी हेर अधिकारी हाजीर आशिल्ले.
मुख्यमंत्र्यांनी सांगलें, उजो पालोवपी दळा वतीन उद्देजकांक अग्नी सुरक्षा प्रमाणपत्र दितात. वेवसाय सुलभताय हाडपा खातीर ही प्रक्रिया सोपी केल्या. अशें जरी आसलें तरी अग्नी सुरक्षा ही फकत उजो पालोवपी दळाची जापसालदारी न्हय. उज्याच्यो घडणुको घडच्यो न्हय म्हूण पर्यटन, उद्देगीक मळार आपले तरेन यत्न करपाक जाय. अश्यो घडणुको टाळपा खातीर जापसालदारी सामान्य जनतेचीय आसा. भलायकी मळार उपचारा परस दुयेंसां जावचीं न्हय म्हूण यत्न करतात. हो नेम अग्नी सुरक्षेकूय लागू जाता.
नितीन रायकार हांणी सांगलें, फाटल्या वर्सा खात्याक ८०२१ कॉल आयिल्ले. हातुंतल्या २९४२ उज्या संबंदी जाल्यार ५०७९ हेर आपत्कालीन परिस्थिती विशींच्यो आशिल्ल्यो. फाटल्या वर्सा दळाक १६५ लोकांचो, ८७४ जनावरांचो जीव वाटावपाक येस आयलें. दळा वतीन शाळा, महाविद्यायांत जागृती कार्यावळी घेतात. आतां मेरेन ४५८३ शिक्षक , ४४६८ सामान्य नागरीक तशेंच ६३५ आपदा इश्ट आनी इश्टीणींक अग्नी सुरक्षा प्रशिक्षण दिलां. उजो पालोवपी दळाचो आपत्कालीन नंबरबेगीनूच ११२ हे प्रणाली कडेन जुळयतले.
तिनूय जिल्ह्यांनी क्षेत्रीय कंट्रोल रूम
मुख्यमंत्र्यांनी सांगलें, दळा वतीन बेगीनूच तिनूय जिल्ह्यांत क्षेत्रीय कंट्रोल रूम सुरू करतले. ते प्रमाण पणजी, मडगांव आनी कुडचड्यां कंट्रोल रूम उबारतले. राज्य प्रशिक्षक कंट्रोल रूमाचें रुपांतर अकादमींत करतले. हांगा दळाच्या जवानां सयत सामान्य लोकांकूय अग्नी सुरक्षेचें प्रशिक्षण घेवपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
