भांगरभूंय | प्रतिनिधी
सरपंच गुरुदास परबः हरीत आनी धवल क्रांतीक चालना दिवपाचें उतर
भांगरभूंय । प्रतिनिधी
दिवचलः दिवचल मतदारसंघांतल्या मेणकुरें ह्या कृशी संस्कृतीचें गिरेस्त दायज सांबाळपी गांवांत हरीत आनी धवल क्रांतीक व्हड प्रमाणांत चालना दितलों. तशेंच दरेका घरांत समृद्धी येवची हे खातीर केंद्र आनी राज्य सरकाराच्यो येवजण्यो थळावो आमदार आनी राज्य सरकाराच्या आदारान चालीक लायतलों, अशी म्हायती प्रगतशील शेतकार, गोंय दूद संस्थेचे संचालक तशेंच मेणकुरेंचे सरपंच गुरुदास (आबली) परब हांणी दिली.
गांवांतली आदर्श कृशी संस्कृती फुडले पिळगेन सांबाळची हे खातीर आमी वावर करतात. गांवचें खाशेलपण म्हणल्यार ह्या गांवांतले खूबशे लोक सरकारी नोकरी करतात. व्हड व्हड पदांचेर आसात, पूण सगळेच जाण शेतां कसतात. ताका लागून आधुनीक तंत्राचो वापर करून युवा पिळगेन शेती, दूद वेवसाय हाचे कडेन वळचे, लघू उद्देगाक चालना दिवपाक मेळची हे खातीर आमचे यत्न आसतले, अशें सरपंच परब हांणी सांगलें.
पर्यावरण सांबाळप, सैमीक उदका स्त्रोतांची राखण करप तेच वांगडा गांवांत कला, खेळ, शिक्षण, भलायकी, सहकार अशे सर्वांगी उदरगतीक चालना दिवचे खातीर पंचायत मंडळ वावुरतलें, अशें परब हांणी सांगलें.
शेतकारांचे आयज खूबशे प्रस्न आसात. शेतां कसपाक खूबश्यो सवलती आसात. ते खातीर जलद कृती येवजण जाय. विवीध तरांच्यो सुदारणाय जावपाक जाय. ते नदरेन आमदारा वरवीं फाटपुरवण करचे खातीर विशेश योगदान दिवपाचो आमचो यत्न आसतलो, अशें परब हांणी म्हणलें.
सरकाराच्या आनी हेर माध्यमांतल्यान जो निधी मेळटा, ताचो योग्य पद्दतीन वापर करून युवा शक्तीचे उदरगती खातीर उपक्रम हातांत घेवप, बायलांक स्वावलंबी करचे खातीर आधुनीक तरेचे प्रशिक्षण दिवन आत्मनिर्भर करप, दरेकाच्या हाताक काम मेळचें हे खातीर येवजण्यो आंखून युवा संघटणा स्थापना करून तांकां स्वावलंबी करचे खातीर महाराष्ट्राचे धरतेर विवीध येवजण्यो आंखप आनी आदर्श गांव संकल्पना पुराय जावच्यो हे खातीर आमी विशेश मोहीम हातांत घेतले, अशें परब हांणी सांगलें. महिला सशक्तीकरण तशेंच हेर विवीध येवजण्यो चालीक लायतना गांवच्यो बायलांक अदीक सक्षम करपी कार्यावळी हातांत घेतले, अशें उपसरपंच कुमुदिनी नायक हांणी सांगलें. ही पंचायत पांच वांगड्यांची. आयज मेरेन स्थीर प्रशासन दिवपी पंचायत म्हूण तिची नामना आसा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
