भांगरभूंय | प्रतिनिधी
ईडीन कशी जादू केली आनी खूबशे जाण थंडसाणेन न्हीद लागपा खातीर कशें भाजपावासी जाले तें तर सगल्यांनीच पळयलां.
समाज आनी समस्या हांचो सदांच लागींचो संबंद उरला. मनशांचो मेळून समाज जाता. जेन्ना खूबशे मनीस एकठांय आसतात, तेन्ना जश्यो कांय बऱ्यो गजाली निर्माण जातात, तश्यो कांय अनुचीत गजालींचीय निर्मिती जायत आसता. समाजांत निर्माण जावपी कांय समस्या इतल्यो सुमारा भायल्यो आसतात आनी इतल्यो व्याप्त आसतात की त्यो समाजाक मुळा सावन हुमटावन उडयतात. तो एक प्रकारचो भुंयकांप आसता. ताचे धपके सगल्यांकूच बसतात. इतलें सगलें नाका खाला जायत आसता हें कोणाकूच कशें कळ्ळें ना, अशें दिसूंक लागता. सारासार विचार करप्यांक अशा गजालीं विशींचो हुस्को दिसूंक लागता. पूण समस्येचें संदीत रुपांतर करप्याकूच हुशार राजकी फुडारी म्हणटात, अशें आयज मेरेनचो इतिहास पळयल्यार कळटा. संकश्ट जर सामकार येत वा तें जर पळयत जाल्यार सामन्य मनीस भियेता. तांकां हुस्को दिसूंक लागता. मागीर तें अमेरिका- इझ्रायल हांचें इराणा आडचें झूज आसूं नाजाल्यार सद्या महाराष्ट्रांत खवदळ घालपी अशोक खरात प्रकरण आसूं. राजकारण हो एक वेगळोच प्रांत आसा. थंय भावने परस वेव्हाराक म्हत्व आसता. राजकारण हें सदांच गतीन बदलत रावपी क्षेत्र आसा. हांगा कोणूच कोणाचो चड तेंपाचो इश्ट नासता आनी दुस्मानूय नासता. सद्या अशोक खरात ह्या भोंदूबाबान जे कितें कारनामे केल्यात तें उक्तडार हाडपा खातीर सुरक्षा यंत्रणांक दीसरात काम करचें पडटा. खरात प्रकरणाची व्याप्ती खूब व्हड आसा. कारण एक प्रकरण उक्तडार आयलें की ताका जोडून आनीक चार प्रकरणां आशिल्ल्याचें दिसून येता.
खूबश्या समाजीक समस्यांनी उडी घेवन सत्य भायर काडपा खातीर यत्न करपी अंजली दमानिया हांणी खरात प्रकरणांतूय सत्य भायर काडून आरोपींचेर कारवाय जावची, हे खातीर यत्न चलयल्यात. अंजली दमानिया ह्यो मूळ आम आदमी पक्षाच्यो फुडारी आशिल्ल्यो. म्हणल्यार सामान्य मनशां खातीर झुजपाचो तांचो पींड आसा. तांणी फक्त खरात प्रकरणांतूच न्हय, जाल्यार जेन्ना कांय भ्रश्टाचाराचीं, गैरवेव्हाराचीं वा अत्याचाराचीं प्रकरणां मुखार आयलीं तेन्ना तांणी त्या विशयाचे कागदोपत्री पुरावे एकठांय करून ताची फाटपुरवण केली. अजीत पवार हयात आसतना तांणी संतोष देशमूख हत्या प्रकरणाचे पुरावे तांचे कडेन दिल्ले. अंजली दमानिया ह्यो समाजीक कार्यकर्त्यो आसात. पूण तांकां इतली भितरली म्हायती, ती लेगीत कागदोपत्री पुराव्यां सयत कशी मेळटा, होवूय खूबशा जाणां खातीर कुतुहलाचो आनी अजापीत करपी विशय आसता. आतां अंजली दमानिया हांकां अशोक खरात हांचे बराबर ज्या राजकी फुडाऱ्यांचे फोना वेल्यान उलोवप जालां ताचो सीडीआर मेळ्ळा. तातूंत खराताक कोणे कितले कॉल केले. ताचो कालावधी कितलो आशिल्लो. हाची सविस्तर म्हायती तांणी दिली. तातूंतलें एक नांव म्हणल्यार सद्याचे उपमुख्यमंत्री एकनाथ शिंदे हांचे आशिल्ल्यान सगल्यांकूच अजाप दिसलां. खरात प्रकरणाचो तपास विशेश तपास पंगडा कडल्यान (एसआयटी) सुरू आसा. ताची पातळिल्लीं पाळांमुळां पळयत जाल्यार खूबशा जाणांक धसको बसला आनी एसी कुडींत रावन लेगीत तांकां घाम सुटूंक लागलां. कारण खराताचे कारनामे फाटलीं 20 वर्सां सुरू आसात. ताका लागून खरात प्रकरणांत खूबश्या जाणांचें हात फातरा पोंदा आसात. दमानिया हांकां सामको गुप्त असो सीडीआर कसो मेळ्ळो? तो तर सीमएओ म्हणल्यार मुख्यमंत्री कचेरेच्या हाताखाला आसता अशे प्रस्न उबाठाचे संजय राऊत आनी सुषमा अंधारे हांणी उपस्थीत करून राज्य सरकार आनी दमानिया हांकां धारेर धरल्यात. ताचेर हो सीडीआर आपल्याक एका अनवळखी मनशान विशिश्ट अॅपाच्या माध्यमांतल्यान दिला अशें स्पश्टीकरण दमानिया हांणी दिलां.
अशोक खरात प्रकरणाची एसआयटीच्या माध्यमांतल्यान खोलायेन चवकशी करतले, जे दोशी आसतले तांचेर कारवाय करतले. इतलेंच न्हय तर दमानिया हांकां सीडीआर कसो मेळ्ळो हाचीय चवकशी करतले अशें मुख्यमंत्री देवेंद्र फडणवीस हांणी सांगलां. ह्या प्रकरणाची चवकशी जायत आसतना राज्यांतल्या भाजपाक फुडलो काळ फायद्याचो थारतलो अश्यो गजाली घडटना दिसून येत आसात. अजीत पवार हांकां आयिल्लें अचकीत मरण. ताका लागून तांच्या पक्षाची शक्त उणी जाली. तातूंत परतून प्रफुल्ल पटेल, सुनील तटकरे एके वटेन जाल्यार सुनेत्रा पवार दुसरे वटेन अशें चित्र दिसता. अशोक खराता कडेन संबंद आशिल्ल्यां मदीं अजीत पवार गटांतल्या फुडाऱ्यांचीं नांवां चड दिसून येतात. हातूंत मुखेल नांव आसा, रुपाली चाकणकर हांचें. ताचे वेल्यान तांकां राज्य महिला आयोगाच्या तशेंच पक्षाच्या महिला प्रदेशाध्यक्षपदाचो राजिनामो दिवचो पडलो. खरात प्रकरण उक्तडार आयले उपरांत उपमुख्यमंत्री एकनाथ शिंदे शांत आसात. खरात प्रकरणाची व्याप्ती व्हड आशिल्ल्यान ताची दीर्घकाळ चवकशी जातली अशेंच सद्या तरी पळयत जाल्यार दिसून येता. दमानिया हांणी सीडीआर मेळोवन मात कांय राजकी फुडाऱ्यांक भेश्टावन उडयल्यात. फडणवीस हांणी ह्या प्रकरणाच्या तपासाचेर नेट दिला. भाजपाचे चाणाक्य म्हणून जांची नामना आसा ते केंद्रीय गृह मंत्री अमीत शाह हांणी महाराष्ट्रांत भाजपाक आतां कुबड्यांची गरज ना अशें जाहीर केलां. इतलेंच न्हय जाल्यार 2029 च्या विधानसभा वेंचणुके उपरांत भाजपाचो भोवमताचो मुख्यमंत्री आसूंक जाय अशें आवाहन केल्लें. खरात प्रकरणाक लागून पुरोगामी महाराष्ट्राची प्रतिमा म्हेळी जायत आसली तरी ह्या प्रकरणाचे चवकशेंत भाजपाच्या दोन वांगड्यांचो प्रभाव उणो जायत आसा. ह्या तपासांत आतां ईडी देंवत जाल्यार उद्धव ठाकरे हांच्या फुडारपणा खालचें सरकार आसतना ईडीन कशी जादू केली आनी खूबशे जाण थंडसाणेन न्हीद लागपा खातीर कशें भाजपावासी जाले तें तर सगल्यांनीच पळयलां. तशेंच जर आतां एकनाथ शिंदे आनी अजीत पवार हांच्या पक्षांतल्या आमदारां विशीं जायत जाल्यार भाजपाचें भोवमत जावंक शकता. ताका लागून अमीत शाह हांचें सपन 2029 पयलींच फळादीक जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
