भांगरभूंय | प्रतिनिधी
15 दिसांत प्रस्न सुटावो जातलो : मंत्री गुदिन्होन घेतली बसका
भांगरभूंय । प्रतिनिधी
पणजी : दाबोळी प्रभू व्हायोलेटा कॉलनींत जावपी दुशीत उदकाची समस्या 15 दिसांत सुटावी जातली. एसटीपी प्रकल्पाक लागून दुशीत उदकाची पुरवण जाता, अशें दिसून आयला. एसटीपी प्रकल्प दुरूस्त करपा सयत ताची तांक वाडोपाची तयारी बिल्डरान बसकेंत दाखयल्या. फाटल्या म्हयन्या सावन प्रभू व्हायोलेटा कॉलनींत दुशीत उदकाची पुरवण जाता. हे फांटभुयेर पंचायत मंत्री आनी थळावे आमदार मॉवीन गुदिन्हो हांणी आयज संबंदीत खात्यांच्या अधिकाऱ्यांची बसका घेतली. हे बसकेक रहिवाशी आनी बिल्डर लेगीत हाजीर आशिल्ले.
दाबोळी हांगच्या प्रभू व्हायोलेटा कॉलनींत 13 मार्च सावन दुशीत उदकाची पुरवण जाता. ह्या कॉलनींत 328 फ्लॅट आनी 45 दुकाना आसा. हाका लागून कॉलनींतले बरेच लोक दुयेंत पडले. रहिवाशांनी मानवाधिकार आयोगा कडेन लेगीत कागाळ केल्या. कॉलनींत रावपी लोक सध्या बिस्लेरी उदकाचो पियेपा खातीर वापर करतात. हे फांटभूयेर आयज पंचायत मंत्री आनी दाबोळीचे आमदार मॉवीन गुदिन्हो हांणी बसका घेतली. हे बसकेक उदका पुरवण, पेयजल, भौशीक बांदकाम, प्रदूशण नियंत्रण मंडळाचे अधिकारी हाजीर आशिल्ले.
एसटीपीक लागून दुशीत उदकाची पुरवण जाता. एसटीपी दुरूस्त करप वा ताची तांक वाडोपाची तयारी बिल्डरान दाखयल्या. हाका लागून 15 दिसांत हो प्रस्न सुटावो जातलो. तशेंच प्रदूशण नियंत्रण मंडळाचे अधिकारी परतून उदकाचे नमुने घेवन तांची तपासणी करतले. एसटीपीची तपासणी करून दुरूस्ती खातीर गौरव पोकळे ह्या अधिकाऱ्याची नेमणूक केल्या.
फुडाराक कॉलनी वा इमारतींत दुशीत उदकाची पुरवण जाली जाल्यार समस्या सुटावी करपा खातीर खासा एसओपी तयार जातली. कॉलनींत जावपी उदका पुरवण ही तरेकवार खात्यांचेर निंबून आसता. सगळ्या खात्यां मदीं समन्वय सादपा खातीर एसओपी तयार जातली, अशें पंचायत मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
