भांगरभूंय | प्रतिनिधी
म्हापशेंः पर्वरींतल्या एससीईआरटी लागसार भिरांकूळ अपघात जालो. ह्या अपघातांत वेगान वचपी ट्रकान धपको दिल्ल्यान चलत वचपी एकल्याक मरण आयले जाल्यार एकलो गंभीर जखमी जालो. ताचेर हॉस्पटलांत उपचार चलतात.
मेळिल्ले म्हायती प्रमाण, ट्रकाचो वेग चड आशिल्लो हाका लागून ड्रायव्हराचे ट्रकावेले नियंत्रण सुटले आनी हो अपघात जाल्लो आसूं येता.
अपघाताची म्हायती मेळटाच पुलीस आनी 108 घडणूक सुवातेर पावली. जखमींक रोखडेच उपचारा खातीर हॉस्पिटलांत व्हेले. पूण उपचारा मजगतीं जखमी जाल्लो कृष्णानंदन देव (उत्तराखंड) हाका मरण आयलें. दुसऱ्या जखमीचेर जीएमसींत उपचार चलतात. ट्रक ड्रायव्हर उमेश शाह (बिहार) हाका पुलिसांनी ताब्यात घेतलो. फुडलो तपास पुलीस करतात.
मजगतीं समतानगर, म्हापशें जाल्ल्या दुचाकीच्या आप- अपघातांत सत्यवान संजीव मोरे (38, घाटेश्वरनगर, खोर्ले म्हापशें) हाका मरण आयलें.
हो अपघात आयतारा, 12 तारखेर 2.30 वराच्या सुमाराक जालो. मयत हावसिंगबोर्ड म्हापशें ते समतानगर मार्गान घाटेश्वरनगर हांगा जीए 03 एल 9287 क्रमांकाच्या दुचाकीवेल्यान वतालो. वाटेत संतोष नायक हांच्या दुकाना लागसारच्या देंवतेचेर ताचो दुचाकीवेलो तोल गेलो आनी तो रस्त्यार कोसळ्ळो आनी गंभीर जखमी जालो.
उपरांत ताका म्हापशेंच्या जिल्हो हॉस्पिटलांत व्हेलो आनी फुडल्या उपचारा खातीर जीएमसींत धाडलो. थंय सोमारा सकाळीं 2.30 वराच्या सुमाराक उपचारा मजगतीं ताका मरण आयले. अपघाताचो पंचनामो म्हापशें पुलीस हवालदार केशव नायक हांणी केलो. फुडलो तपास पुलीस उपनिरीक्षक दत्तप्रसाद पंडित करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
