भांगरभूंय | प्रतिनिधी
भांगरभूंय । प्रतिनिधी
पणजीः मळ्यांतल्या तळ्यांतले नुस्तें हे सिवेजीच्या प्रदुशणाक लागून मेलां असो निश्कर्श प्रदुशण नियंत्रण मंडळान काडलां. सद्या प्रदुशण मंडळान उदकाचे सॅम्पल काडून व्हेल्यात आनी अहवाल आयले उपरांत खरें कारण मुखार येतलें, अशें महापौर रोहीत मोन्सेरात हांणी सांगलें. मजगतीं नुस्तें मरपाच्यो घडणुको ह्यान पयली घडल्यांत अशें थळाव्यांनी सांगलें.
नेवगीनगर- मळ्यांत आशिल्ल्या खाऱ्या उदकाच्या तळ्यांत हजारांनी नुस्तीं मरून पडिल्ल्यान वाठारांत भिरांत पातळ्ळी. हातूंत किलाप, भाणोशी तशेंच चणक हे नुस्तें उदका वयर उफेवन तांच्यो राशी पडिल्ल्यो. ह्या मेल्ले नुस्त्यांक लागून सरभोंवतणी घाणी पडिल्ल्यो. उपरांत पणजी महानगरपालिकेन तळे नितळ करून मेल्ले नुस्त्यांचो विलो लायलो.
हे विशीं आमी संबंदीत खात्याची बसका आपयल्ली. हातूंत नुस्तेमार, प्रदुशण नियंत्रण आनी उदका स्रोत खात्यान सांगलें, ह्या तळ्यांत सिवेज सोडिल्ले कारणान ऑक्सिजनांचो उणाव जावन ह्या नुस्त्यांक मरण आयलें अशे मॉन्सेरात हांणी सांगलें.
सद्या सिवेजीचो विशय हो पणजेचो मुखेल विशय जालां. सांतिनेज खारीजाचेर लक्ष मारल्यार तातूंत चडश्यो कॉलनी सिवेज सोडटात आनी लोक कोयर उडयतात. देखून 15 एप्रिलाक आमी सगळ्या खात्यांची बसका आपयल्या. हातूंत प्रदुशण नियंत्रण मंडळ, भौशिक बांदकाम, पियेवपा उदक, पुलीस, नुस्तेमार आनी न्हंय येरादारी खाते मेळून कितें तरी सुटावो काडटले, अशीं म्हायती मॉन्सेरात हांणी दिली.
सिवेजीच्या कारणान उदकांत ऑक्सिजनाचो उणाव जाला अशें प्रदुशण नियंत्रण मंडळाचे म्हणणें आसा. पूण हे विशीं आमका दीर्घकाळ वेवस्थित सुटावो जाय. काय घरांक अजून सिवेज जोडणी दिवपाची उरल्या. हे बसकेंत आमी पणजे आनी ताळगांवचे स्थितीचो नियाळ घेतले. सिवेज सोडपी दर घराचो सोद घेवन आमी हो विशय सुटावो करतले, अशें स्पश्टीकरण मॉन्सेरात हांणी दिलें.
ही नुस्ते मरपाची घडणूक पयलेच खेप जावंक ना. ह्यान पयली नुस्ते गर्मेच्या दिसानींच मेलां, अशें तळ्या लागसार रावपी आलेक्सियो फर्नांडीस हांणी सांगलें.
54 वर्सा जाली आमी हांगासर रावतात. ही नुस्तें मरपाची घडणुक दुसरे काय तिसरे खेप जाल्या. आतां फक्त बारीक नुस्तें मेलां. आठ वर्सा पयली भेंडां इतलीं व्हडलीं चणाकां मेल्लीं. दोन दीस जाले घाणी येतालो. आतां पालिकेन मेल्ले नुस्तें काडून व्हेलां देखून चड घाण येना, अशे फर्नांडीस हांणी म्हणलें.
उदक भितर येवपाक जायना म्हूण तळ्याकडे मानस केल्या. पयली दर्याचें उदक भितर येवन बरें व्हांवताले. आतां भितर उदक येना आनी तळ्यांतल्यान उदक चड भायर वता. ते भायर तळ्या कुशीक लोक येवन कोयर उडयतात. चार वर्सा उपरांत आतां ह्या तळ्यांत नुस्तें मरपाची घडणूक घडल्या, अशी म्हायती फर्नांडीस हांणी दिली.
मळ्यांतल्या तळें हे जैविविधतायन गिरेस्त खाऱ्या उदकाचें तळें आसा. ह्या तळ्यांत किलाप, भाणोशी, चणक सोडून मानगी लेगीत रावतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
