भांगरभूंय | प्रतिनिधी
पणजीः खणगिणीच्या व्हाळांत बुडपा पसून आपल्या धाकल्या भावाक वाटावपा खातीर आपलो जीव धोक्यांत घालपी सानिका नायकाक (17) मरण आयलें. जीएमसींत उपचार चालू आसतना तिका आयज सोमारा मरण आयलें. काल, आयतारा हेच घडणुकेंत 10 वर्सां पिरायेच्या श्लोक नायकाक मरण आयलें.
मेळिल्ले म्हायती प्रमाण, वास्तवाडो-कुडचडेंचे नायक कुटुंब आयतारा सुटयेचो आनंद घेवपाक खणगिणी वाठारांत गेल्ले. सानिका आनी श्लोक दोगूय आपल्या कुटुंबा सयत उदकांत न्हांवपाचो आनंद घेताले. न्हंयेंत वाडत वचपी भरतीक लागून व्हाळांतल्या उदकाचो प्रवाह अचकीत वाडलो आनी श्लोक उदकांत बुडपाक लागलो. धाकटो भाव दोळ्यां मुखार बुडटा तें पळोवन व्हडली भयण सनिकान कसलोच विचार करिनासतना ताका वांटोवपाक उदकांत उडी मारली. पूण उदकाचो प्रवाह चड आशिल्ल्यान सनिकाय बुडपाक लागली.
कुटुंबांतल्या लोकांनी मजती खातीर बोवाळ केले उपरांत थळाव्या लोकांनी रोखडेंच श्लोक आनी सानिकाक उदकांतल्यान भायर काडले. पूण तो मेरेन श्लोकाक मरण आयिल्लें. बेशुध्द सनिकाक रोखडेच उपचारा खातीर जीएमसींत व्हेले. दोतोरांनी तिका वाटावपाचो पुराय यत्न केलो, पूण सनिका वांचली ना. उपचारा मजगतीं आयज सोमारा सकाळीं तिकाय मरण आयलें. फकत 24 वरां भितर एकाच कुटुंबांतल्या दोग भावंडांक अकाली मरण आयिल्ल्यान नायक कुटुंबाचेर दुखाचो दोंगर कोसळ्ळो. पुलिसांनी ही केस नोंद करुन फुडलो तपास सुरु केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
