भांगरभूंय | प्रतिनिधी
पणजीः 21 ते 25 एप्रिल मेरेन जावपी लयराई देवीचे वर्सुकी जात्रेंत सरकारान दिल्ले सगळे नेम पाळटले. धोंडां सयत सामान्य भक्तांक देवीचें दर्शन घेवपाक परवानगी आसा.
पूण फकत धोंडां खातीर आशिल्ल्या धर्मीक विधींत हेर लोकांनी वांटो घेवन गर्दी करची न्हय असो उलो देवस्थान कार्यकारी मंडळाचे अध्यक्ष दीनानाथ गांवकार हांणी केला. सोमारा पणजेंत जाल्ले पत्रकार परिशदेंत ते उलयताले. ह्या वेळार भास्कर गांवकार, आतीश गांवकार, दयानंद गांवकार, वासुदेव गांवकार, प्रकाश गांवकार आनी हेर हाजीर आशिल्ले.
दीनानाथ गांवकार हांणी सांगलें, फाटल्या वर्सा जाल्ले दुर्घटनेक लागून अंदूं जात्रेंत भक्तांक प्रवेश मेळचो ना असो गैरसमज पाताळ्ळा. पूण अंदूं लेगीत सगळ्या भक्तांक देवीचें दर्शन करपाक मेळटलें. फकत दर्शन घेतना कांय नेम पाळचे पडटले. जिल्लोधिकारी कार्यालय, पुलीस, येरादारी, भलायकी खात्यान दिल्ल्या सगळ्या सुचोवण्यांक कार्यकारी मंडळान पाळो दिला. भक्तांक झीगझॅग पध्दतीच्या लायनींतल्यान जात्रेंत सोडटले. हे खातीर पुलिसांची नेमणूक जातली. सामान्य भक्तां खातीर तशेंच धोंडां खातीर वेगवेगळे मार्ग आसतले.
जात्रे वेळार वाठारांत नदर दवरपा खातीर 92 सीसीटीव्ही कॅमेरे बसयल्यात अशें तांणी सांगलें. हाचो खर्च देवस्थानान केला. दुकानांक लागून रस्ते अरुंद जावचे न्हय हे खातीर अंदूं फक्त 34 दुकानांक सशर्त परवानगी दिल्या. हातूंतलीं 9 दुकानां होमकुंडाच्या वयल्या भागांत आनी 25 दुकानां देवळाच्या फाटल्यान आसतलीं. सरकाराच्या सुचोवण्यां प्रमाण आमी बॅरिकेडिंगाचें काम सुरू केलां. जात्रे पयलीं हें काम पुराय जातलें. सभा मंडप सोडल्यार हेर सुवातींनी बॅरिकेड घालतले. जात्रे वेळार कसलोच बोवाळ जावचो न्हय हाची जतनाय भक्तांनी घेवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
