भांगरभूंय | प्रतिनिधी
म्हापशेंः कोठारभाट – हळदोणा सेट थॉमस इगर्जेच्या आवारांतल्या आंब्याच्या झाडाचो फांटो मोडून घराचेर पडलो. हे दुर्घटनेंत तीग ल्हान भुरग्यां सयत पांच जाण जखमी जाले. हातूंत देड वर्सा पिरायेच्या भुरग्याचो आस्पाव आसा. सगल्यांक उपचारा खातीर जीएमसींत दाखल केल्यात.
घडणुकेची म्हायती मेळ्ळे बरोबर 108 एम्ब्युलन्स आनी म्हापशें उजो पालोवपी दळाचे जवान घडणूक थळार पावले. शेजाऱ्यांनी जखमी लोकांक घरांतल्यान भायर काडले आनी पयलीं तांकां एम्ब्युलन्सांतल्यान हळदोणा प्राथमीक भलायकी केंद्रांत व्हेले. उपरांत थंयच्यान तांकां फुडल्या उपचारा खातीर जीएमसींत धाडले.
जखमी जाल्ल्या मदीं मूळ तामिळनाडूतले मेरी (60), दासलीन (25), लायका (6), दिव्या (4), लिया (देड) हांचो आस्वाप आसा. सोमारा सकाळीं सुमार 9.40 वरांचेर ही घडणूक घडली. म्हापशे उजो पालोवपी दळाचे उपअधिकारी ज्ञानेश्वर सावंत हांच्या मार्गदर्शना खाला दळाच्या कर्मचाऱ्यांनी झाड कापून कुशीक काडलें. मजगतीं, सेंट थॉमस इगर्जेचे केअरटेकर पीटर (मूळ तमिळनाडू) आपल्या कुटुंबा वांगडा इगर्जेच्या मालकीच्या घरांत रावतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
