भांगरभूंय | प्रतिनिधी
पणजीः फोंडें पोटवेंचणुके खातीर पोस्टल बॅलट जाले उपरांत मतदानाच्या आदल्या दिसा पोटवेंटणूक रद्द केल्ल्या उच्च न्यायालयाच्या निवाड्याक काँग्रेस उमेदवार डॉ. केतन भाटीकार हांणी सर्वोच्च न्यायालयांत आव्हान दिले. सर्वोच्च न्यायालयांत आव्हान याचिका दाखल केल्या. ह्या सप्तकांत ती सुनावणी खातीर येवपाची शक्यताय आसा.
अ. भा. काँग्रेस (काँग्रेस) समितीचे वांगडी गिरीश चोडणकार हांणी ही म्हायती दिली. हे याचिकेंत वेंचणूक आयोग आनी हेर संबंदीतांक प्रतिवादी केल्यात. आदले मुख्यमंत्री रवी नायक हांच्या मरणाक लागून फोंडें मतदारसंघाची सुवात रितीं जाल्ली. हाचे खातीर पोटवेंचणूक घेवपाची अधिसुचोवणी 15 मार्चाक जारी केल्ली. पोटवेंचणूक 9 एप्रीलाक जावपाची आशिल्ली. उमेदवारी अर्ज स्विकारपा वांगडाच भौशीक प्रचारय सोंपिल्लो.
टपाल मतदान प्रक्रिया पुराय जाले उपरांत गोंयच्या मुंबय उच्च न्यायालयान 8 एप्रिलाक दनपारां पोटवेंचणूक रद्द करपाचो निवाडो एके याचिकेचेर दिलो. ह्या निकालाक लागून वेंचणुके खातीर खर्च केल्ले कोटी रुपया फुकट गेले. उमेदवारांचे तशेंच राजकी पक्षांचेय यत्न फुकट गेले. सगळ्यांत म्हत्वाचें म्हणल्यार फुडल्या विधानसभा वेंचणुके मेरेन फोंडें मतदारसंघ आमदारा विना उरतलो. लोकप्रतिनिधीत्व कायदो आनी उच्च न्यायालयाच्या निकालाचो अभ्यास अॅड. कार्लुस फेरेरा हांणी करून याचिकेचो मसुदो तयार केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
