भांगरभूंय | प्रतिनिधी
पणजीः इंडियन प्रिमियर लीग (आयपीएल) मॅचींचेर बेकायदेशीर सट्टेबाजी करपी व्हड रॅकेट वेर्णा पुलिसांनी उक्ताडार हाडले. पुलिसांनी सांकवाळेच्या बिराडाच्या कुडीचेर धाड घालून उत्तर प्रदेश आनी छत्तीसगडांतल्या चार दुबावितांक धरून तांकां अटक केली. चेन्नय सुपर किंग्स आनी दिल्ली कॅपिटल्स हांचे मदीं चालू आशिल्ल्या मॅची वेळार ही सट्टेबाजी चलताली तेन्ना कारवाय केली.
मेळिल्ले म्हायती प्रमाण, 11 एप्रील रातचे 10:40 ते 12 एप्रील सकाळीं 3:30 मेरेन सांकवाळच्या शिंदोलीम वाठारांतल्या एका घराच्या पयल्या माळ्यार वेर्णा पुलिसांनी ही कारवाय केल्या. प्रांजल तिवारी (23, उत्तर प्रदेश), अमर दावडा (33, छत्तीसगड), शशांक कुमार साहू (19, उत्तर प्रदेश) आणि संदीप सिंग (23, उत्तर प्रदेश) अशीं अटक केल्ल्यांची नांवा आसात. हें चवगूय फाटल्या कांय दिसां सावन सांकवाळे वाठारांत बिराडाक रावताले आनी सट्टेबाजीचो वेव्हार करताले.
हे धाडींत पुलिसांनी सट्टेबाजी खातीर वापरिल्ले 10 मोबायल फोन, दोन लॅपटॉप, एक टॅबलेट, इंटरनॅट राऊटर आनी 37 हजार रुपया मेळून वट्ट 2.5 लाखांचो म्हाल जप्त केलो. ही कारवाय वेर्णा पुलीस पुलीस निरिक्षक आनंद शिरोडकार हांच्या मार्गदर्शना खाला उपनिरिक्षक प्रिस्ली कार्व्हालो आनी तांच्या पंगडान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
