कोलव्यां बेकायदेशीर ‘धिरयो’ आनी ‘गडगडो’ जुगार

भांगरभूंय | प्रतिनिधी

मडगांवः गोंयांत ‘धिरयो’चेर बंदी आनी जिल्लो पातळेचे समिती वरवीं कारवाय करपाचो आदेश आसून लेगीत कोलवा वाठारांत कायद्याचे उल्लंघन जाता अशें दिसून आयला. काल शेनवारा सांजवेळार सेर्नाभाटी-कोलवाच्या शेतजमनींत शेंकड्यांनी नागरिकांच्या हाजिरेंत धिरयो आनी ‘गडगडो’ नांवाचो जुगार उक्तेपणान आयोजीत केलो. पुलीस आनी जिल्लो प्रशासनान ह्या बेकायदेशीर वावराचेर पुरायपणान आडनदर केल्ल्यान प्रशासनाच्या कार्यक्षमतायचेर प्रस्न उप्रासता.
गोंयांत जनावरांच्या झगड्यांचेर बंदी आसा आनी प्रशासनान खूबदां कारवाय करपाची शिटकावणी दिल्या. पूण साश्टी तालुक्यांत अजूनय उक्त्या सुवातींनी अशें प्रकार बेकायदेशीर चालू आसात. शेनवारा सांजवेळा कोलवाच्या सेर्नाभाटी वाठारांतल्या प्रकाराचो व्हिडियो सोशल मिडियाचेर व्हायरल जालो तरी पुलिसांनी अजून कसलीच कारवाय करूंक ना. हे घडणुकेक लागून कायदो आनी सुवेवस्था चालीक लावपा विशीं परत एक फावट प्रस्न उप्रासल्यात.
धिरयो चालू आशिल्लो तेच सुवातेर ‘गडगडो’ जुगाराचो अड्डो आशिल्लो. धिरयो सयत जुगार खेळपाचेर बंदी आसतना अशे तरेचे वावर भौशीक मळार सुरू आशिल्ल्यान बेकायदेशीर वावराचेर कारवाय हो प्रस्न मुखार आयला.
लोकांक म्हायती मेळटा, पूण पुलिसांक ना
कोलवाच्या धिरयो सुवातेर शेंकड्यांनी लोक हाजीर आशिल्ले. इतले व्हड प्रमाणांत धिरयो घडोवन हाडटले हाची सामान्य लोकांक खबर कळ्ळी, पूण थंय एकूय पुलीस मात नाशिल्लो. हाचे वयल्यान स्पश्टपणान दिसून येता की ह्यो गजालीं लोकांक कळटा पूण पुलिसांक ताची खबर कळना. हे प्रकार पुलिस आनी दक्षीण गोंय जिल्हो दंडाधिकाऱ्यान नेमिल्ले समितीचे गैरहजेरेंत कसलीच आडमेळीं नासतना चलताले.