भांगरभूंय | प्रतिनिधी
30 परस चड सुवातांचेर आसतले सीसीटीव्ही कॅमेरे
भांगरभूयं|प्रतिनिधी
पणजी : शिरगांव हांगा लयराय जात्रेच्या पयले दिसा 21 एप्रिलाक फकत 34 दुकाना/स्टॉलाक मान्यताय दितले. 21 तारखे उपरांत दुकानांचो आंकडो वाडटलो मात तो मर्यादित आसतलो. धोंड तशेंच हेर लोकांच्या सुरक्षा वेवस्थेचो विचार करून प्रशासननान हो निर्णय घेतला. उत्तर गोंय जिल्होधिकारी अंकित यादव हांणी ही म्हायती दिली.
शिरगांव लयराय देवीची जात्रा अंदू 21 एप्रिलाक जातली. फाटले वर्सा जात्रे दिसा खेटा खेटी जावन 6 जाणांक मरण आयिल्ले जाल्यार 70 परस चड भाविक जखमी जाल्ले. शिरगांवच्या वर्सुकी जात्रेक व्हडा प्रमाणांत गर्दी जाता. फाटले वर्सा प्रमाण खेटाखेटी सारको प्रकार जावचो न्हय म्हूण अंदूं सरकार तशेंच प्रशासनान उपाययेवजण्यो घेतल्या. रस्ते रुंद करपा सयत येरादारी तशेंच पार्किंगा खातीर खासा वेवस्था केल्या. ज्या रस्त्यावेल्यान धोंड होमकुंडाकडेन वतात त्या रस्त्या कुशीक एकूय दुकान आसचे ना. पयले दिसा 21 तारखेक देवळा फाटल्यान आशिल्ल्या मैदानाचेर 15 दुकाना आसतली. हेर रस्त्यांचेर 10 जाल्यार तळी कुशीक 9 दुकाना आसतली. जात्रेच्या दुसऱ्या दिसा उपरांत गर्दी उणी जाता. हाका लागून 22 तारखे सावन चड दुकाना आसतली मात निर्बंध आसतलेच. सुरक्षा उपाय आनी आराखडो तपासून समिती दुकानाक मान्यताय दितली. येरादारी आनी लोकांक आडखळ जावची ना, अशे पद्दतीन दुकानांची थळा निश्चित केल्या.
गर्दीचेर नियंत्रण दवरपा सयत सुरक्षेचो नियाळ घेवपा खातीर 30 परस चड सुवातांचेर सीसीटीव्ही कॅमेऱ्यांची वेवस्था केल्या. सुरक्षा वेवस्था तपासणे खातीर 18 एप्रिलाक मॉक ड्रिल लेगीत जातले. उत्तर गोंय जिल्होधिकारी, दिवचलचे उपजिल्होधिकारी हे हेर अधिकाऱ्यां सयत दर दिसा सुरक्षा उपाय येवजण्यो तशेंच हेर कामांचो नियाळ घेत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
