भांगरभूंय | प्रतिनिधी
कटिहारः बिहारच्या कटिहार जिल्ह्यांत शेनवारा भिरांकूळ अपघात जालो. खाजगी बस आनी पिकअप व्हॅन हांचे मदीं जाल्ल्या भिरांकूळ अपघातांत 13 जाणांक मरण आयलें आनी 30 परस चड प्रवासी गंभीर जखमी जाल्यात.
मेळिल्ले म्हायती प्रमाण, काल सांजेच्या सुमार 6:30 वरांचेर राष्ट्रीय म्हामार्गाचेर हो अपघात जालो. वेगान वचपी बशीच्या ड्रायव्हराचेर बशीवेले नियंत्रण सुटले आनी मुखारल्यान येवपी पिकअप व्हॅनाक बसीचो नेटान धपको बसलो. पिकअप व्हॅनांतल्यान प्रवास करपी सगळे लोक शेजारच्या पूर्णिया जिल्ह्यांतले रावपी आसात.
घडणुकेची म्हायती मेळ्ळे बरोबर थळाव्या नागरिकांच्या मजतीन पुलिसांनी बचावकार्य सुरू केले. जखमींक रोखडेंच लागसारच्या हॉस्पिटलांत दाखल केले. उपचारा वेळार आनीक 6 जाणांक मरण आयिल्ल्यान वट्ट मरण आयिल्ल्याचो आंकडो 13 चेर पावलो. जायत्या जखमींची स्थिती अजूनय गंभीर आशिल्ल्यान हो आंकडो वाडपाची शक्यताय आसा. ह्या अपघातांत बस ड्रायव्हर गंभीर जखमी जाला.
बिहाराचे मुख्यमंत्री नीतीश कुमार हांणी हे घडणुकेचेर दुख्ख उक्तायलां. मरण आयिल्ल्यांच्या कुटुंबाक दरेकीं 2 लाख रुपया आनी गंभीर जखमी जाल्ल्यांक 50 हजार रुपयांची मजत दिवपाची घोशणा तांणी केल्या. तशेंच जखमींचेर योग्य उपचार करपाचेर निर्देश तांणी प्रशासनाक दिल्यात. सध्या पुलिसांनी मेल्ल्या मनशांची वळख करपाचे काम सुरू केला आनी अपघाताचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
