भांगरभूंय | प्रतिनिधी
नवी दिल्ली, खबरां संस्थाः भारतीय रेल्वे अर्थीक वर्स 2026-27त प्रवास सोयीस्कर आनी हाय-टेक करपा खातीर जायते व्हड बदल करपाची आसा. तिकेट रद्द करपाचे आनी रिफंडाचे नेम बदलप पसून ते देशांतली पयली हायड्रोजन ट्रेन ट्रॅकांचेर हाडपा मेरेन रेल्वे मंत्रालयान तयारी केल्या. रिफंडाचे नवे धोरण 15 एप्रील मेरेन लागू जातलें. ते भायर प्रवाशांक अंदूं 12 नव्यो वंदे भारत स्लीपर ट्रेन पळोवपाक मेळटल्यो.
ह्या अर्थीक वर्सा रेल्वेंत जावपी व्हडले बदल…..
नवे नेम: ट्रेन सुटचे 8 वरां आदीं रिफंड दितले
भारतीय रेल्वेन तिकेट रद्द करपाचे आनी रिफंड दिवपाचे नेम खर केल्यात. आतां ट्रेन सुटचे पयलीं 8 वरां मेरेन खंयच्याय प्रवाशान तिकेट रद्द केल्यार ताका रिफंड मेळटलो. पयलीं हो वेळ 4 वरां आशिल्लो, आतां तो 8 वरां केलां.
आतां खंयच्याय स्टेशनाचेर काउंटर तिकेट रद्द करूं येता
आतां काउंटर तिकेट रद्द करपा खातीर त्याच स्टेशनाचेर वा निमाण्या स्टेशनाचेर वचपाची गरज ना. प्रवाशांक आतां देशांतल्या खंयच्याय रेल्वे स्टेशनाच्या काउंटराचेर वचून तिकेट रद्द करून रिफंड मेळोवंक मेळटा.
चार्ट तयार जाले उपरांत लेगीत बोर्डिंग स्टेशन बदलूं येता
आतां प्रवाशांक बेगीनूच ट्रेनीच्या सुरवातेच्या स्टेशनां वयल्यान भायर सरचे पयलीं 30 मिनटां मेरेन डिजिटल पध्दतीन आपलें बोर्डिंग स्टेशन बदलपाक मेळटलें. पयलीं ही सुविधा चार्ट तयार करचे पयलीं मेळटाली. नव्या नेमा प्रमाण प्रवाशी आपल्या पोरन्या स्टेशनांतल्यान ट्रेन धरपाक शकलो ना जाल्यार फुडलें स्टेशन निवडून कन्फर्म सीटाचेर प्रवास करपाक शकता.
ट्रेनांत ट्रॅव्हल क्लास अपग्रेड करपाची सुविधा मेळटली
आतां प्रवाशी ट्रेन सुटचे 30 मिनटां मेरेन ट्रॅव्हल क्लास म्हळ्यार स्लीपरांतल्यान एसी मेरेन अपग्रेड करपाक शकता. पयलीं हो बदल चार्ट तयार जावचे पयलींच करप शक्य आशिल्लो.
12 नवे वंदे भारत स्लीपर ट्रेन
लांब अंतराचे प्रवास प्रीमियम करपा खातीर रेल्वे अंदूं 12 वंदे भारत स्लीपर रेल्वे सुरू करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
