भांगरभूंय | प्रतिनिधी
दुयेंस बरें जावं येता, जिणें शैली बदलपाची आसा गरज
भांगरभूंय । प्रतिनिधी
पणजी : आमच्या देशांत आयटी मळार काम करपी 82 टक्के लोकांक फॅटी लिव्हर आसा. देशांत सादारणपणान 42 कोटी लोकांचें लिव्हर फॅटी आसा. हाका बलबलीतपणां, गोडेंमूत, मद्यपान अश्यो खूबश्यो गजाली कारणीभूत आसात. योग्य व्यायाम, सकस आहार अशें जिणेंशैलींत बदल केल्यार फॅटी लिव्हर दुयेंस बरें करप शक्य आसा, अशें डॉ. प्रशांत भांगी हांणी सांगलें. शेनवारा गोवा कॅन्सर सोसायटी वतीन आयोजीत केल्ले कार्यावळींत ते उलयताले. हे आदीं तांणी फिग्द प्रत्यारोपण पद्दतीची म्हायती दिली.
डॉ. भांगी हांणी सांगलें, फॅटी लिव्हर उणें करचे खातीर संतुलीत आहार घेवप गरजेचो आसा. फास्ट फूड, तेलकट पदार्थ, तळिल्ले पदार्थ बंद करपाची गरज आसा. तेच वांगडा चुकनासतना व्यायाम करप तितलोच म्हत्वाचो आसा. सकाळीं आनी सांजे वेळार 2 वरां चलप वा जॉगींग केलें जाल्यार लेगीत व्हड फरक पडूं येता. ह्या उपायांनी वजन उणें जावन फॅटी लिव्हर पुराय तरेन बरें जावपाक शकता. मात सध्या फकत ह्याच दोन गजालींचो विचार करून चलचो ना. मद्यपान हें लेगीत फिग्दाच्या दुयेंसाचें एक म्हत्वाचें कारण थारता.
फिग्दाचीं सगलीं दुयेंसां फकत मद्यपानाक लागून जातात, अशें ना. मात मद्यपानाक लागून फिग्द तशेंच कुडीचेर वायट परिणाम जाता, हें निश्चीत. सुमारा भायर मद्यपानाक लागून लिव्हर सिसोसीस जाल्ल्या 31 वा 39 वर्सांच्या दुयेंतींचें फिग्द प्रत्यारोपण केलां. 1990, 2000 त लिव्हर सिसोसीस मद्यपानाक लागुनूच जाता, असो समज आशिल्लो. मात काळा प्रमाण तातूंत बदल जाला. हेपेटायटीस बी आनी सी हाका लागून लेगीत लिव्हर सिसोसीस जाता. 10 वर्सां दीं मुखेलपणान उत्तर भारतांतले फिग्द प्रत्यारोपण केल्ल्या 49 टक्के दुयेंतींक हेपेटायटीस आशिल्लें.
फाटल्या 10 वर्सांत हेपेटाययीसाचेर खूब प्रभावी वखदां उपलब्ध जाल्यांत. ताका लागून हेपेटायटीसाक लागून लिव्हर सिसोसीस जावपाचें प्रमाण 20 टक्कें इतलें उणें जालां. फिग्दाचो कॅन्सर जाल्ल्या दुयेंतीन कसलेच पद्दतीचे उपचार करचे, हें दरेका दुयेंती प्रमाण बदलता. कॅन्सराचो टप्पो पळोवनूच उपरांत फिग्द प्रत्यारोपण करतात. प्रत्यारोपण केल्ल्या दुयेंतींचें आयुश्य तुळेंत चड आशिल्ल्याचें अभ्यासांत दिसून आयलां. अवयव दाना विशीं लोकांमदीं आशिल्ले गैरसमज पयस करचे खातीर अदीक जागृती जावपाक जाय, अशें डॉ. भांगी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
