भांगरभूंय | प्रतिनिधी
मेलबर्नः संवसारभरांतल्या जायत्या भुरग्यांचेर लैंगीक अत्याचार केल्ल्यान मूळ गोंयकार ट्रेव्हर फर्नांडीस (41) हाका युनायटेड किंगडमच्या (यूके) न्यायालयान जन्मठेपेची ख्यास्त आयकयली. युनायटेड किंगडमांतल्या न्यायालयान दिल्या. न्यायालयान ताच्या ह्या कृतीचें वर्णन ‘किळसवाणे’ आनी ‘अभूतपूर्व क्रूरपण’ अशें केलां.
मूळ गोंयचो ट्रेव्हर फर्नांडीस कांय वर्सां आदीं यूकेंत स्थलांतरीत जाल्लो. उपरांत ताणें 2015 ते 2020 ह्या काळांत जायत्या नेण्टे भुरग्यांक हांयस दाखोवन शोशण केल्ल्याचें उक्तें जालें. ह्या प्रकरणांत यूके न्यायालयान ताका वयली ख्यास्त फर्मायली.
स्विडनांतल्या निवासी पत्त्यावेल्यान तो हें काम करतालो. अमेरिकेच्या अधिकाऱ्यांच्या आनी क्राउन प्रॉसिक्युशन सर्विसाच्या सहकार्यान नॅशनल क्रिमिनल इन्व्हेस्टिगेशन एजन्सीन केल्ल्या आंतरराष्ट्रीय तपासांतल्यान ट्रेव्हराचे गुन्यांव उक्ताडार आयले.
अमेरिकेंतल्या कायद्याची अंमलबजावणी करपी एजन्सीनी एका नेण्ट्या भुरग्याचो दुबावीत ऑनलायन हालचाली वळखून घेतले उपरांत हो तपास सुरु जालो आनी यूके मेरेन पावलो. आनी फर्नांडीसाच्या गुन्यांवकारी कृत्यांचें स्वरूप उक्तें जालें.
अधिकाऱ्यांच्या म्हणण्या प्रमाण, अमेरिकेंतल्या एका तरणाटे पिडीत चलयेन कागाळ केल्ल्यान हें प्रकरण उक्तें जालें. नाजाल्यार फर्नांडीस कोणाच्याच लक्षांत येनासतना गुन्यांव आजून गुन्यांव करीत रावता आसलो आसूं येता अशें तपास करप्यांनी सांगलें.
कायद्याची अंमलबजावणी करपी एजन्सीनी ह्या प्रकरणांतल्या आंतरराष्ट्रीय सहकार्याची तोखणाय करुन नमूद केले, जायत्या अधिकार क्षेत्रांतल्या अधिकाऱ्यांनी पिडितांची वळख करून तांकां न्याय मेळोवन दिवपाक अथक परिश्रम घेतल्यात. ह्या विस्तारीत चवकशेचो एक भाग म्हूण संवसारभरांतल्या शेंकड्यांनी व्यक्तींची वळख करून तांचे संरक्षण केलें.
2022 वर्सा 14 वर्सांची ख्यास्त
भुरग्यांचें शोशण संबंदीत जायत्या गुन्यांवांनी दोशी थारल्या उपरांत ताका 2022 वर्सा 14 वर्सां बंदखणीची ख्यास्त फर्मायली. पूण डिजिटल साधनांचें न्यायालयीन विश्लेशणा सयत फुडल्या चवकशेंत गुन्यांवांची खूब व्यापक पद्दत दिसून आयली. हाका लागून यूके, अमेरिका, कॅनडा, आयर्लंड आनी नॉर्वेंतल्या पिडीत संबंदीत आनीक 67 आरोपपत्र दाखल केल्या.
आरोपीन गुन्यांव केलो कबूल
स्विंडन क्रावन न्यायालयांत खंडणी, नेण्टे भुरग्यांक लैंगीक कृत्यां खातीर प्रवृत्त करप, अश्लील फोटो दवरप आनी शॅर करप ह्या सगल्या आरोपां सयत हेर आरोपांनी फर्नांडीसान आपलो गुन्यांव कबूल केला. उपरांत ताका जन्मठेपेची ख्यास्त फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
