भांगरभूंय | प्रतिनिधी
फोंडें पोटवेंचणुकेंत केल्ल्या प्रचारांतल्यान मतदारांक, मतदारसंघाक कितें जाय तें उमेदवार, राजकी पक्ष, सरकाराक कळ्ळां.
फोंडें विधानसभा पोटवेंचणूक रद्द जाली. वेंचणुकेंतले राजकी पक्ष आनी पक्षाच्या उमेदवारांनी मतदारांक दिल्लें उतर पाळपाचे यत्न करचे. सरकाराक आयआयटीक सुवात, हाॅस्पिटलांतल्यो सुविधा फुडल्या स म्हयन्यां भितर दिवप शक्य आसा. मंत्रीपद तालुक्यांतल्या अणभवी आमदाराक राज्योत्सव दिसा आदीं मेळ्ळ्यार उदरगतीक नेट येतलो. पेडणें तालुक्याक मंत्रीपद मेळप बरें.
आयआयटी आसा थंयच गोवा इंजिनियरींग म्हाविद्यालयाच्या काॅम्प्लेक्सांतल्यान फुडें वचची. आयआयटी गोंयांत हाडटना सरकारी गोवा अभियांत्रिकी म्हाविद्यालयाचो पांवडो सुदारप ही मोख आशिल्ली. आयआयटींत शिकोवपाक आयज गोंया कडेन अणभवी प्रोफेसर आसात. आयआयटीक व्हड प्रमाणात भूंय दिवपा आदीं गोंय आयआयटींतल्या तशेंच अभियांत्रिकी शिक्षणाचो नियाळ तज्ञ समिती वरवीं घेवचो. अभियांत्रिकी म्हाविद्यालयांतले प्रोफेसर शिक्षणीक पांवड्या वयले गिन्यांनी, अणभवी गोंयकार अभियंत्यांचो ते समितींत आस्पाव करचो.
सरकारांत फोंडें तालुक्यांतले आमदार, मंत्री आसात. आमदार, मंत्र्यांचे मजतीन नगरसेवक, नगराध्यक्ष, उपनगराध्यक्ष, खासदार, मतदार मतदारसंघांतलो लोकोउपेगी वावर फुडें व्हरुंक शकतात. वेंचणुकेंतल्या राजकी पक्षाचे उमेदवार मतदारां पासत वावुरतले, फोंडें नगरपालिका वेंचणुकेंत आसपाक जाय. खरो राजकारणी मतदारां पसून पयस रावंक शकना, लोका पासत सदांच वावुरता. वेंचणुकेंत जैत मेळ्ळें ना, विरोधकांत आसले तरी मतदारसंघांची उदरगत थांबची ना हें आदले मुख्यमंत्री रवी नायक, संरक्षण मंत्री मनोहर पर्रीकार हांणी दाखोवन दिलां. मतदारां पासत ते सत्ता नासतना, विरोधांत आसतनाय वावुरल्यात.
फोंडें पोटवेंचणुकेंत केल्ल्या प्रचारांतल्यान मतदारांक, मतदारसंघाक कितें जाय तें उमेदवार, राजकी पक्ष, सरकाराक कळ्ळां. आयआयटी गोंयांत फोंड्यां आसा, व्हडय जाता. गरज आसा पुराय पांवड्याच्या काॅम्प्लेक्साची. अभियांत्रिकीच्या विद्यार्थ्यांक पदवे उपरांतचे शिक्षण दिवपाक आयआयटी उपेगी. आयआयटीत गोंयचे कुशळ, अणभवी प्राध्यापक शिकोवंक शकतात. आयआयटीत नाॅन टिचींग कर्मचारी चडांत चड राज्यांतले आसतले हेखातीर कबलात फुडारांत करची. आयआयटी शिक्षणांत नवे विशय येवपाची गरज आसा. भारतीय आयआयटी देशा भायर पावता तेन्ना देशांतल्यो थोड्यो आयआयटी कोसमेतात. अशे वेळार गोंयांतली आयआयटी व्हड जातना म्हाविद्यालयांत, संशोधनांत शिकिल्ले, अणभवी, थळावेय आसतले हे विशीं कबलात करपाची गरज उप्रासल्या. ते विशीं कबलात करप शक्य आसा?
जिल्हो हाॅस्पिटलांतल्यो अडचणी रवीबाब विरोधी बांकार आशिल्ले तेन्नाय मांडटाले. सरकाराच्या फाटल्यान लागून हाॅस्पिटलाचो पांवडो वाडचो हे खातीर तांचे येत्न आशिल्ले. सरकारान हाॅस्पिटल सुदारचें, गरजेच्यो साधनसुविधा, दोतोर हाॅस्पिटलाक मेळपाक जाय. केंद्रीय येवजण्यांचो लाव राज्य सरकार घेवंक शकता. वीज मंत्री सुदिनबाब ढवळीकार, आमदार गोविंद गावडे हांणी हाॅस्पिटलांत अचूक कितें उणें आसा तें अभ्यास करून सरकाराक सांगचें. फोंडें हाॅस्पिटलाचो पांवडो वाडटलो हेखातीर नगरसेवक, तालुक्यांतल्या आमदारांनी एकवटान वावुरपाक जाय.
फोंडें तालुक्याक एक कोयर वेवस्थापन प्रकल्प बेगीन मेळपाक जाय. केरी वाठारांतल्या विजयदुर्गा देवस्थान कार्यकारिणीन कोयर वेवस्थापनाक नवी दिका दिवपाक आरंभ केला. भूतखांब केरी वाठारांत ल्हानसो अल्ट्रामाॅर्डन कोयर वेवस्थापन प्रकल्प कित्याक जावचो न्हय? फोंडें तालुक्यांतल्या जाणकारांक एकठांय हाडून ते विशीं भासाभास सरकारान सुरू करची. फोंड्यां सरकारी हाॅस्पिटलाचो नियाळ ज्येश्ठ दोतोरां वरवी करून हाॅस्पिटलाक कितें जाय तें समजून घेवचें. फोंडें तालुको गिन्यान, अध्यात्म, तंत्रज्ञान राज्याक दिता तें केन्ना सावन? उदरगती बगर तें शक्य आशिल्लें?
‘इनफ इज इनफ’ चळवळीचे ‘रिटायर्ड बट नाॅट टायर्ड’ भारतीय हायकोर्टाचे आदले मुखेल न्यायमुर्ती फेर्दीनबाब रिबेलो हांकां हुस्को कसलो दिसता? गोंयांतल्या गांवगिऱ्या वाठारांत उंच, मजल्यार मजल्यांच्यो बिल्डिंगो, हावजिंग काॅम्पल्केस येतात तांचो. गोंयांतली नळ्यांची, दायज घरांय बदल्ल्यांत, त्या घरांनी वेस्टर्न सुविधाय येतात, आयल्यात ताची जाणविकाय तांकां आसा. गोंयांत व्हड हावजींग प्रकल्पांत कोण रावतात? सरकाराक पुराय म्हायती मेळची, फेकूंक सोदपाची तांक गोंय पुलिसांक आसा शांतिकायेच्या गोंयांत देशच न्हय विदेशांतले व्हड जुगारी, आतंकवादी रावतात, रावंक येतले तो हुस्को तांकां आसा. गोंयचीं जार्दिनां काँक्रीटांत बंद जातात तोवूय हुस्को तांकां आसा. जार्दिनांक वंय घालपाची गरज उप्रासल्या, जार्दिनांची जतनाय घेवप, राखणे दवरप गरजेचें जालां हेंवूय तांकां कळ्ळां आसतलें. गोमंतभूषण पुरस्काराचो हावेसय आयज तांकां नासतलो. गोंयचें नांव तांणी देशांत व्हड केलां, ते राजकारणी पूण राजकारणांत घुस्पून रावले ना. प्रशिक्षणातल्यान न्यायमुर्ती, न्यायाधीश ते घडोवंक शकल्यात. गोंयाक, सरकाराक नवी दिका ते दाखोवंक शकतात. सरकाराक ते मार्गदर्शक थारतले, वावुरतले हातूंत दुबाव ना. प्रशासन फोंडें पोटवेंचणुके वेळार धांवपाक लागलें. बरोच तेंप जावंक नाशिल्ल्यो बदल्यो जावपाक लागल्यात. बदलेचे सुवातेर कर्मचारी, अधिकारी वतात, बदली रद्द करून घेतात ताचेर देखरेख सरकारान दवरची.
सरकाराक दक्षता खातें घटमूट करचें पडटलें. मुखेल करून पर्यटन उद्देग, वेवसायाचेर झुजा तेंपार संकश्ट येता तेन्ना सुपुल्ल्या गोंयची वाट विदेशांतल्या जुगाऱ्यांकय दिसतली. दर्यादेगा पलतडचें म्होंवाळ, पाचवें ताल्ल गोंय आपलें घर कित्याक जावचें न्हय अशें तांकां दिसल्यार अजाप जावचें न्हय. गोंयांत पर्यटक चोंब्यानी येतात, सेल्फी काडटात, गोंयचें नांव इबाडटात तांचेर नदर दवरपाक उंचेल्या तांकीचे सीसीटीव्ही कॅमेरा आसात. दर्यादेगे पलतडचें गोंय कशें आसा तें आतां पर्यटन मंत्री सांगपाक लागल्यात. गोंयची वेगळी जायरात जाता तेन्ना गोंयचो सैम, वझरे, घसघशे दाखोवचे, कोयर वेवस्थापन कशें करचें तें सांगचें. केंद्र सरकाराच्या ल्हारां बराबरीन वतना गोंय वेगळें, भांगराळें. गोंय शांतिकायेची भूंय, उदरगतीचे नवे दिकेन वता ही म्हायती दिवया फटींगपण नाका, मीठ मसालोय नाका.
गोंय विधानसभा वेंचणूक 2027 बेगीन जावंक शकता. ती जाणविकाय कॅन्सल जाल्ले फोंडें पोटवेंचणुकेन करून दिली.
सरकार लोकांच्या दारांत पावता तेन्ना प्रशासनय धांवता. वेंचणूक लागीं आयिल्ल्यान प्रशासन धांवपाक लागलां, पावस आनी पावसा आदींय तें धांवतलें अशी आस्त बाळगुया. एके फोंडे पोटवेंचणुकेन बरेंच कितें शिकयलां, वेंचणूक कायद्याकय नवी दिका तातूंतल्यान मेळटली. स्वतंत्र वेंचणूक आयोग आनी यंत्रणा देशाक दिवपाचो होच वगत.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
