भांगरभूंय | प्रतिनिधी
पणजी : वेर्णा बायपासाचेर बिरेस्तारा रातीं भिरांकूळ अपघात जालो. नवजात बाळकांक घेवन वचपी एके गाडयेन नेटान धपको दिलो. मडगांवच्या दक्षीण गोंय जिल्लो हॉस्पिटलाचे दिकेन ही ऍम्बुलन्स वतना वेर्णा बगल रस्त्यार हो अपघात जालो. ह्या भिरांकूळ धपक्या उपरांतूय ॲम्बुलन्सींतले सगलीं नवजात बाळकां आनी वैजकी कर्मचारी पुरायेन सुरक्षीत आसा. कोणाकूच कांय जावंक ना. हे घडणुकेक लागून ह्या वाठारांत कांय काळ ताणाचें वातावरण निर्माण जालें.
हे विशीं मेळिल्ले चड म्हायती प्रमाण, ॲम्बुलन्स बाळकांक घेवन वतना मुखारच्यान येवपी गाडयेन तिका धपको दिलो. ह्या अपघातांतली गाडी चलोवपी तरणाटी सोर्याचे घुवळेंत आशिल्ल्याचो दुबाव पुलिसांनी उक्तायला. ते नदरेन तपास चालू आसा. अपघाता उपरांत घडणुके सुवातेर नागरिकांनी व्हड गर्दी केल्ली. मात बाळकां सुरक्षीत आशिल्ल्यान सगल्यांनी सुटकेचो स्वास घेतलो.
पुलीस रोखडेच घडणुके सुवातेर पावन येरादारी कोयंडी पयस केली आनी परिस्थिती नियंत्रणांत हाडली. सोरो पियेन वाहन चलयिल्ले खातीर, तशेंच निश्पाप बाळकांक धोको निर्माण जाल्ल्या थळाव्यांनी तिडक उक्तायल्या.
सध्या वेर्णा पुलीस ह्या प्रकरणाचो तपास करतात. गाडी चालक तरणाटेची वैजकी तपासणी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
