भांगरभूंय | प्रतिनिधी
पणजीः बायल आनी भुरगीं उदरगत खात्यान गोंयच्या बाराय म्हालांतल्या १०९ आंगणवाडींनी आंगणवाडी कर्मचार्यांची रिती पदां भरपाक काडल्यात. हातूंत आंगणवाडी सेविका खातीर ५१ पदां जाल्यार आंगणवाडी मजतनीसा खातीर ६३ पदां जाहीर केल्यांत. ह्या पदां खातीर सरळ मुलाखत जातली.
बायलां आनी भुरगीं उदरगत खात्यान शुक्रारा जायरात उजवाडाक हाडून आंगणवाडी सेविका आनी आंगणवाडी मजतनीस ह्या पदांच्या रित्या सुवांती खातीर पात्र बायल उमेदवारां कडल्यान साद्या कागदाचेर अर्ज आमंत्रीत केल्यात.
हीं पदां पुराय मानधन तत्त्वाचेर भरतले. आंगणवाडी सेविके खातीर दर म्हयन्याक रु. १०,००० आनी आंगणवाडी मजतनीस खातीर दर म्हयन्याक रु. ६,००० मानधन दितले. उमेदवारान अर्जांत नांव, बापूय वा घोवाचें नांव, पत्तो, पिराय, शिक्षणीक पात्रताय, अणभव (आसल्यार) आदींचो सविस्तर तपशील नमूद करून स्वतःचो फोटो लावचो. निवड जाल्ल्या उमेदवारांक वसांत कमीत कमी ३०० दीस पुराय वेळ काम करप सक्तीचें आसा.
ज्या ब्लॉकांत आंगणवाडी आसा ते सुवाते वयल्या भुरगीं उदरगत प्रकल्प अधिकारी कार्यालयांत सगल्या गरजेच्या कागदपत्रां सयत २२ मार्च २०२६ सांजेच्या ४.०० वरां मेरेन वा ते पयलीं दाखल करचें. मुलाखती खातीर पात्र थारिल्ल्या उमेदवारांची वळेरी आनी मुलाखतीची तारीख ३० मार्च २०२६ दिसा संबंदीत सीडीपीओ कार्यालयांतल्या नोटीस बोर्डाचेर लायतले. ते खातीर वेगळे अशें मुलाखत पत्र धाडचे नात.
आंगणवाडी सेविका आनी मजतनीस पदां खातीरची निवड ही वैजकी तंदुरुस्तीच्या अधीन आसतली.
म्हाल वट्ट आंगणवाडी आंगणवाडी सेविका आंगणवाडी मजतनीस
पेडणें : ३ २ १
बार्देस : २५ १५ ११
दिवचल : ७ ३ ४
सत्तरी : ८ ५ ३
तिसवाडी : ११ ५ ६
फोंडें : १२ ७ ५
सांगें : १ १ ०
केपें : २ २ ०
मुरगांव : १६ ४ १५
साश्ट : १७ ३ १५
काणकोण : २ १ १
धारबांदोडा : ५ ३ २
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
