भांगरभूंय | प्रतिनिधी
भांगरभूंय । पत्रक
पणजीः पद्मविभूशण डॉ गंगुबाई हानगल आनी गानसरस्वती किशोरीताई आमोणकार हांचे यादस्तीक गीत शकुन, युवा पणजी आनी गोंय सरकाराच्या कला आनी संस्कृती खात्यान जोड पालवान आयोजीत केल्ल्या स्वरांजली संगीत कार्यावळीक रसिकांचो उपाट प्रतिसाद फावो जालो.
कार्यावळीचे सुरवेक डॉ शकुंतला भरणे हांची निर्मणी आशिल्ल्या घुमटाचो नाद ह्या यूट्युब गीताचें तशेंच गीत शकुन ह्या यूट्युब चॅनलाचें पंडित प्रसाद सावकार हांचे हस्तुकीं लोकार्पण केलें. ते उपरांत संवादिनी वादक वल्लभ पाडगांवकार आनी प्रतिक धामस्कार हांणी भीमपलास रागान मैफिलीक सुरवात केली.
पं. रमेश सुखटणकार हांचो शिश्य उत्कर्श नागवेकारान राग पुरिया आनी तांच्या गुरून बांदिल्ली मिश्र अभोगीतली बंदीश सादर केली. गंगुबाईचे शिश्य अशोक नाडगीर हांणी राय मियाँ मल्हार सादर करून रसिकांक मंत्रमुग्ध केलें. ह्या उपरांत गीत शकुन वतीन वर्सावळीच्या व्याख्यानांत बेगम अख्तर आनी गिरीजा देवी हांची शिश्या रेखा सूर्य हाचें व्याख्यान जालें.
मनिष पिंगळे हाचें स्लाईट गितार वादन आनी उपरांत तांच्या वांगडा ‘व्हॅली रिकॉल्स बँड’चें सादरीकरण हे कार्यावळीचें मुखेल आकर्शण आशिल्लें. प्रशांत महाले (बासरी), डॉ. नरेश मडगांवकार (संतूर), डॉ. उदय कुलकर्णी (तबलें) अशा कलाकारांच्या अविश्कारांत शकुंतला भरणेचें ठुमरी बाज दाखोवपी गायन जालें.
कार्यावळीक पं. प्रसाद सावकार, उद्देजक आनी सम्राट संगीत अकादमीचे अध्यक्ष डॉ. प्रुफुल्ल हेदे, युवा पणजीचे शशांक सुखठणकार, कला आनी संस्कृती संचालक संचालक सगुण वेळीप हाजीर आशिल्ले. गौतमी कामत हिणे येवकार गीत सादर केलें. सनथ भरणेन सगल्यांक येवकार दिलो. गीता नारकारान उपकार मानले. मानसी वाळवे हिणे सूत्रनिवेदन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
